由陳國坤、敖嘉年及郭奕芯等主演的電影《拳道》，今晚在尖沙嘴舉行首映禮，出席演員還包括陳國邦、徐穎堃及黃澤鋒等。疫情爆發第四波，電影公司毋懼群組爆發，演員齊齊除下口罩大合照。
郭奕芯昨日25歲生日，劇組亦在首映禮上為她準備生日蛋糕慶祝。郭奕芯表示，過了25歲以後，應該不會再公開自己年齡以免尷尬，她說:「生日冇特別慶祝，算是在工作中渡過。」她稱現時單身無拍拖：「想搵個好男人，但係好難，要睇定啲先。」對於工作環境是否沒有好男人，她說：「唔係冇，係要相處過先，經過時間慢慢搵。」郭奕芯透露，上一段感情在兩年前結束，她更不慎爆出前度是幕前藝人。由於郭奕芯曾在訪問中透露被前度「家暴」，但幾經追問她亦堅決不透露前度身份，她解釋：「唔想講太多，好似幫人宣傳咁。」對於下次找男友，要找圈內還是圈外，她說：「冇所謂，真誠好緊要，要搵個真心嘅好難。」
陳國坤今次為電影宣傳，相隔4個月再返港，他說：「4個月冇返屋企，佢哋冇詐型，我就算化咗灰，阿仔（陳真）都認得我，個仔見到我係開心，因為媽咪（黃依汶）管教嚴厲，媽咪唔鍾意佢做嘅嘢我都畀，好似食朱古力、夜瞓。」陳國坤又指，過往都是他陪伴兒子玩，教導他雙節棍、踢沙包、打拳，他說：「佢兩歲已經開始學，不過媽咪就鍾意佢彈琴，所以我都陪佢一齊學彈琴，最困難係學樂理，但為咗個仔冇所謂。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
