張敬軒昨晚在紅館舉行第二場《張敬軒 X 香港中樂團盛樂》，近日軒仔不停化身「早餐KOL」，在IG狂post新請回來的工人姐姐每朝為他準備的早餐相，一度掀起話題，軒仔預告工人姐姐將於本周五捧場，不過昨晚他又再上身，不單大爆屋企「遮遮」的由來，他笑說：「呢一個咁嘅背脊，一粒瘡都冇，就係日日食白粥同麵包食番來！我直情開始食到有啲妊娠紋添！」聽到觀眾的掌聲，軒仔無奈嘆謂：「你話唱得咁辛苦為乜，遮遮仲多掌聲過我。」
提到這個外傭姐姐的由來，軒仔表示姐姐曾經長時間在台灣工作，識講80%國語，當時一心想請她是希望用作照顧來港一同生活的父母：「我爸爸媽媽都唔識講英文，同事叫vincent，佢哋就叫人『瘟神』，所以諗住請個識國語姐姐照顧，點知因為疫情關係，佢哋嚟香港嘅計劃一再拖延，已經十一個月冇見面，只係靠視像傾電話。」
今年對軒仔來說，可謂相當難過的一年，與父母分隔、家庭有幾位親人離世，小狗生病確診漸凍症，甚至連工作過程中都受到不少考驗：「好多時候都唔知自己有冇工開，喺音樂道路上可以點樣行，其實你哋經歷到，我都係一樣。喺開騷之前，仲收到一個網民留言，有位歌迷舊年買咗飛，今年離開咗嚟唔到。我唔知佢嘅家人今晚有冇嚟，希望佢在天之靈 ，聽到我哋今晚歌聲。」他續說：「今年所有發生嘅事，都話畀我哋知，幸福唔係必然。我覺得就算經歷咁多唔開心，做人都唔可以一直俾情緒干擾自己，唔可以每日掹大對眼，只係帶住傷痛。」
於是軒仔決定將每日的早餐post上網：「開始時冇特別意思，只係分享下畀大家知，所謂一個知名歌手嘅早餐，分分鐘唔夠你個早餐好。但係後嚟有好多朋友留言，今日做嘢唔開心，睇完我個Post好咗好多，生活係咁樣，當命運，時勢唔夠好，就要自己搵一啲快樂，搵一啲滿足感畀自己，慢慢，你就會發現身邊其實擁有好多愛，同時你亦可以令身邊人感受到愛，咁樣我哋先可以為社會帶來改變。」最後軒仔說：「你哋多謝我啲早餐post，我反而好榮幸可以通過我嘅不幸為大家帶嚟咁多娛樂，只要大家開心，我就開心！」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
