如果《男兒當入樽》是男仕們熱血回憶，那麼，《青春火花》和《排球女將》一定是60、70後女仕們的青春印記。
ViuTV近日推出鄧麗欣（Stephy）、顧定軒和MIRROR主演的新劇《男排女將》，以香港排球教練葉鳳儀真人真事作藍本，講述一班年輕人如何追逐排球夢。其實過往不少電視和電影都愛以排球運動作主題，如仍在上映中、由鞏俐主演及陳可辛執導的電影《奪冠》，就以中國女排真人真事改編；而陳可辛女友吳君如早在2000年買下泰國電影《人妖打排球》版權在香港上映，結果以1,500萬港幣創下香港泰片票房紀錄。不過，講到最經典的，當然是70、80年代初風靡港日兩地的日劇《青春火花》和《排球女將》。
《青春火花》於1970年代尾在無綫播出，主題曲《Victory》第一句：「V-I-C-T-O-R-Y」已感受到鬥志激昂，女主角蘇由美（岡田可愛飾）因為胞姊死去而憎恨排球，後經馬志教練（中山仁飾）游說下加入排球隊，隊友莊瑪利（中山麻理飾）有感一山不能藏二虎而轉投另一隊，成為蘇由美勁敵。當年蘇由美一招「鬼影變幻球」將對手打到片甲不留，而這句招式後來被二次創作，變成金句「斗零變大牛」，還有阿貞（日籍台灣女演員范文雀飾演）與蘇由美拍檔使出的「移形換影」，都是港人集體回憶。70年代無綫曾邀中山麻理亮相《歡樂今宵》，哄動程度拍得住《大長今》李英愛訪港；1994年錢永強更將這部經典劇拍成同名港產片《青春火花》，由爾冬陞飾演馬志教練、李若彤飾演蘇由美，樊亦敏則扮演莊瑪利，去年大台處境劇《愛·回家之開心速遞》亦大玩《青春火花》橋段，可見這部勵志劇如何經典。
至於1981年香港播出的《排球女將》，同樣掀起排球狂潮，由荒木由美子飾演的小鹿純子劇中束起兩條小孖辮，一招「離心獨劈」打遍天下無敵手，連56歲阿里巴巴創辦人馬雲都是超級fans。
原來身為80後的鄧麗欣（Stephy），都曾睇過這兩部經典日劇，Stephy日前接受《蘋果》訪問時說：「我大個咗時翻睇返，2部都有睇過，《青春火花》我有印象啲，香港有上過電影版，我仲好記得『鬼影變幻球』，比較誇張啲嗰種，自己好細個已經鍾意排球，好鍾意睇，覺得佢哋啲衫好靚。自己打排球都有紮兩條孖辮，所以都曾經有個綽號叫孖辮妹。」可認為劇集或電影以某一樣運動做題材有助推動該項運動？Stephy說：「我覺得一定會，睇嗰段時間會突然好想玩嗰樣嘢，嗰時我睇完一部外國電影講打拳，《Million Dollar Baby》（擊情），睇完好想學打拳，起碼影響嗰段時間令好多人想學想認識呢個運動，令到人對運動嗰種熱血出咗嚟，譬如籃球電影我都睇到好熱血，但我自己唔係打籃球材料。」
身為《男排女將》監製陳淑賢，日前接受《蘋果》電話訪問時表示自己當年睇日劇《青春火花》和《排球女將》十分享受，但今次開拍《男排女將》並非受當年日劇影響，陳淑賢說：「我諗以前嘅影響可能係嗰份熱血，運動類型劇集都會係逆境自強，但我哋唔會去到『離心獨劈』咁誇張，我哋會走實在啲，我哋做咗好多資料搜集，真係排球點樣打，然後利用打排球嘅技巧方法，去演繹人生面對困難、點樣去面對，同以前處理方法係有分別，我哋會放大佢哋點樣去改良自己或者克服困難。我都希望呢個劇出街之後，啲人會對排球有興趣，我哋都想推廣。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|