入行接近20年的鄧麗欣（Stephy），近年在電影上終於做出成績，她從一個總是為愛情受傷的「阿寶」，搖身一變成為《金都》的「阿芳」。在現實生活中，鄧麗欣的生活亦不斷求蛻變，求變的原因得簡單，就是要忠於自己。
已經有17年沒有拍香港劇集的Stephy，最近參與ViuTV新劇《男排女將》的演出，Stephy曾是港青排球隊的成員，在2017年更自資組成Loey排球隊。難得故事以她最愛的排球為題材，所以當日她收到這個邀請後，心情實在有點震撼：「我自己恨咗好耐，拍一套自己鍾意嘅題材嘅戲，其實都幾震撼同感動。真係冇諗過好玩，等咗好耐先有機會，難得喺人生有呢個經驗，我當然會將呢個經歷投入喺戲。」
今次Stephy與男子組合MIRROR成員合作，事有湊巧，她當年亦是女子組合Cookies出身，問到有否回想當年？她說：「其實隔咗咁多年，有好多嘢都唔記得咗，嗰陣好似經歷咗好多嘢，但其實我哋一齊嘅時間唔係好耐，都係一年左右，所以係好唔同。不過而家年代成熟啲，大個咗，好多嘢都識諗，唔似以前乜都唔識，成班人柴娃娃。」她續說：「不過有啲嘢諗番似一場夢，但係都開心，過去嘅事造就現在嘅自己，無論係好與唔好、高與低，每一樣嘢都好緊要。」
正如Stephy所言，當年每一個階段的改變，都令她長大：「出道好幸運，多人照顧，乜都安排晒 ，變咗唔使自己安排太多。直到離開咗 ，要自己諗一個新方向嘅時候，重新去檢視自己。有一段時間我去咗內地拍劇，成個環境唔同晒，要重新適應，嗰段時間算係轉捩點，由喺舊公司主力做一個歌手、唱歌為主，之後決定向電影、演員發展，要擺多啲時間，呢個決定係冇人幫我諗到，知道邊個位置係最舒服，最適合自己，所以都係一個大選擇，當然，你唔可以話我係放棄歌唱事業，只係擺低咗。」
問到她會否覺得有遺憾？Stephy笑說：「冇呀，好開心，呢個選擇係正確、舒服同開心，我可以好專注去做一樣嘢。喺過程入面，我自己都得到成果、認同。」之不過當放下歌手這身份後，連帶緋聞與是非都減少，「我又冇為意喎，不過你講完又好似係。嗰時選擇唔係話唔鍾意唱歌，我自己都好享受出碟，喺台上唱歌同觀眾互動， 但係歌手同演員嘅配套係好唔同，歌手行出嚟有唔同形象，變相娛樂性要大啲，好似難做番自己，我覺得自己唔係鍾意呢樣嘢，原來呢兩樣嘢係connect，我唔鍾意呢個配套，所以我鍾意呢個世界多過歌手嘅世界。」
現階段對於Stephy而言，心態比其他更為重要：「我成日都覺得最緊要係自己嘅想法，冇人可以幫你決定未來，乜嘢方向，所以要調整自己嘅心態。我當係畀自己一個題目，呢行成長好快，我會畀自己一個好清晰嘅選擇，選擇咗之後要負責任，一直都係咁。其實我好少諗以前，亦好少諗好遠嘅將來，我覺得呢一刻係好重要，如果有一個機會喺面前，就一定要好好把握，太多嘢係自己預計唔到，不如好好做好目前嘅嘢，人生好無常。」至於會否有安排結婚這個題目？她笑說：「冇喎！反而係想做吓生意，呢啲又真係隨緣。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|