呂珊的真人好瘦，不笑的樣子有點惡、有點苦！56歲的她仍獨身，她說自己心中富裕，而現實生活的她很富有，傳聞她是隱世小富婆，高峯期擁有5層樓，訪問這天，她手上戴的是極罕「玫瑰金撈」。
4歲入行做童星的呂珊，在娛樂圈打滾了52年，唱過夜總會和酒廊，拍過電視和電影，一份工做足半世紀仍未厭倦，近大半年受武漢肺炎影響，行內好多人冇工開，呂珊在YouTube開Channel做「友星有聲」網上騷，今年12月更將初試啼聲做粵劇舞台劇《共和三夢》，與李居明、龍貫天合作。「做親呢行，我覺得一入侯門深似海，冇厭倦，只會越嚟越鍾意，雖然由細接觸呢個圈，但唔同經歷，年紀唔同，感覺已經唔同。始終有樣嘢我覺得幾得意，每日返工唱歌接觸都係大人，我幾乎冇細路仔朋友，所以養成一樣嘢，比較老積。」呂珊說。
當年是世叔伯呂奇帶她入行，很多事都順理成章，呂珊回憶道：「其實細路仔誤打誤撞，點諗到過咗一段時間，慢慢踏上軌道，直到我差唔多30歲，曾經諗過人人都有志願，呢個職業係咪我以後職業呢？我都有問自己，似乎係喎，如果唔做，轉行做乜呢？我諗冇邊個行業，比呢個行業更加適合我。因為好熱鬧，又見到好多嘢，當中梗有好有唔好，唔係樣樣都好如意，譬如你想做呢個工作，未必做得到，亦未必做得好，梗有瑕疵，可能你覺得我化，但應該嘅，冇得食古不化，呢行好多人好努力，有機會發揮同演出已經好幸福。」
由童星做到資深藝人，呂珊貢獻了一生青春，在《陀槍師姐II》扮演被丈夫毒打的蔣秀蘭、於《皆大歡喜》飾演毒婦火辣辣、《西關大少》的李德蓉、《耀舞長安》中飾演慈母，演來入木三分，角色都令觀眾留下深刻印象，雖然從未做過女主角，但呂珊很豁達：「無論大小我都希望再進步，我完全冇唔開心，入咗TVB更加學到更多嘢，除咗學習群體工作重要性，拍過好多唔同類型劇集，去過好多地方，夥拍好多拍檔，喺人生上學到好多嘢，得着好大。」拍電視劇時間長，外表瘦弱的她，試過拍外景時狂流鼻血：「call咗護衞員，因為流到唔停，準備送我去睇醫生，後來冇事，同事好好，好關心我。」
入行半世紀，呂珊有四個傳聞，現由當事人親自解說。
傳聞一：曾患厭食症，食餸只啜汁，當年拍《潮拜武當》時，有服裝間同事發現她皮包骨，要着兩條褲，瘦到只剩80多磅。
呂珊：「黐線，梗唔係，減肥係20幾歲時，嗰時狂食薯片，又食好多飯。而家我冇特別減，不過好多時因為唱歌唔可以亂食嘢，首先油炸嘢唔食得，凍嘢唔飲得，甜又惹痰唔得。我而家都皮包骨，冇乜特別。點解着兩條褲？其實咁嘅，首先我皮膚敏感好犀利，好容易成身出疹或風癩，着古裝太多嘢刮身，同埋外景唔方便搵地方換衫，所以着多一套緊身衫。人哋睇表面一知半解，成日覺得我好怪，其實不值一晒。」呂珊指現在體重有45kg（99磅），最瘦時期得95磅左右。
傳聞二：曾大量脫髮，要戴假髮。
呂珊：「唉！嗰時因為拍嘢，同埋用嗰隻染髮、大量噴髮膠，焗住好多個鐘，冇得返屋企沖涼，頭都冇得洗，幾樣加埋，我唔知邊樣係元兇，搞吓搞吓咪甩髮，嗰時有頭皮問題，所以用假髮，長期係咁，頭皮唔會健康，所以要成日戴帽，唔可以喺休息時再整個頭，幾個鐘都唔畀佢唞，頭髮真係會甩晒，好無奈，而家冇甩髮啦，好轉好多。」
傳聞三：跟環星老闆張國林傳緋聞多年，對方始終一直沒給她名份，亦不想公開這段關係，令她鬱鬱不歡。
呂珊：冇話唔畀名份，冇話鬱鬱不歡，全部構思出嚟，完全唔係我講，始於合作咗十幾年，又係經理人，又係唱片公司老闆，成日一齊工作，老朋友，唔知點解俾人煲。而家有冇拍拖？我「拍親拖」都十幾個男人，全部一齊食飯飲酒。冇乜刻唔刻意拍拖，除咗20幾歲拍拖之外，有時啱傾咪多啲一齊，我對婚姻冇期望過，一啲都唔孤獨，好多朋友。
傳聞四：賺埋好多，高峯期手持五層樓。
呂珊：冇，嘩，有就真係發達啦。我冇乜投資心得，我冇金股外滙，唔識睇住個市，又冇時間，所以唔敢貿然投資，啲錢係有血有淚。都係買樓，實物好啲，但都係自己住、屋企人住，唔係要嚟炒賣，所以飛唔起，冇話平買貴賣。幾多層？屋企人咁多咪咁多，唔係乜豪宅、一間八九千萬，一般啫，中上家庭。
撰文：余燕儀
攝影：沈健程
攝錄：廖達燊
場地：SKYE Rooftop Bar and Restaurant
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|