新增內容、圖片
TVB藝人陳百祥（阿叻）因為多次出席撐警活動，結果獲港府另眼相看，今年10月獲頒授銅紫荊星章；流着藍絲血的他，本應奉公守法乖乖聽港府話做良好市民，然而，踢爆阿叻涉違反限聚令，在平安夜當晚偕同老婆黃杏秀及親友共12人，到鹽田梓的高級西餐廳「小島大廚」食私房菜，還公然坐在露天位置圍埋一枱，視林鄭立下的限聚令如無物，有圖有真相。
當日傍晚6點半，阿叻和秀姑到西貢碼頭會合友人，有友人已當街除口罩食煙懶理防疫條例，一行人坐船到鹽田梓，半小時後抵達小島，前往島上一間以omakase（廚師發辦）菜式聞名的西餐廳，12人一起坐在靠近岸邊的室外長枱，然而，因為武漢肺炎肆虐，港府立下2人限聚令，兼且傍晚6時後不能堂食，阿叻和餐廳已明顯違反規例，而記者在追訪期間，還聽到有人用普通話講「乾杯」，又相約通關後上順德玩，相信跟阿叻飯敍的是愛國同胞。
直至晚上11時，他們才飲飽食醉搭船返西貢市，阿叻落船後才戴上口罩，又違戴罩令，記者上前採訪，問剛才去哪裏慶祝？秀姑說：「唔係，我哋去探個朋友。」問是否在朋友屋企食飯？秀姑答係，仲話聖誕願望是疫情快點過去，記者轉問阿叻，指讀者爆料他們去鹽田梓飯局，惟6時後禁堂食，這樣做是否不當？秀姑死撐：「係朋友屋企嚟。」追問不是西餐廳？阿叻擘大眼講大話：「梗係唔係，冇飯局呀，去人屋企探人有乜飯局。」問到會否擔心犯限聚令？阿叻說：「呢個唔係限聚令，去私人屋企食飯又唔係限聚令。」問到會否擔心中招，他說：「我哋全部都防備得好好，洗手戴晒口罩。」記者指他們光顧西餐廳有圖有真相，阿叻繼續詭辯：「唔係喎，我去探人啫，去人屋企食飯啫。」
餐廳老闆被問到6時後仍招待阿叻等人堂食，他就表示冇回應。而違反限聚令及戴罩令，要被罰款5,000元，警方則指沒接獲相關報案記錄，沒回應會否主動跟進有人涉犯罪。之前才爆出「跳舞群組」、「回歸群組」令香港疫情淪陷，估唔到身為藍絲模範兼有銅紫荊星章加持的阿叻，卻又帶頭破壞法紀，早前更被踢爆住宅涉潛建，果然冇改錯名，真係至叻犯錯。
今日《蘋果》記者走訪「小島大廚」餐廳，發覺沒開門營業，而官網FB都改埋名「Chef」疑避風頭，不過，網民卻湧入FB洗板留言狠批：「今晚6點後10位吖唔該，阿叻都得，其他人係咪都得㗎」、「呢個時勢仲無視限聚令，真係自私到冇人有！病毒溫床，好污糟呀」、「我想訂荷蘭叻嗰個套餐請問幾多錢呀？」、「想訂12位，唱阿叻哥首我至叻可唔可以平啲？」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|