《黃秋生大師班》做人最緊要有得揀｜吾港戲 (尹學仁）
- 發布日期：2020-12-22 18:02
已複製
本來 12 月有好多好戲上畫，港產有紀錄片《好好拍電影》，講許鞍華導演生平，劇情片有《一秒拳王》，有樂隊 Tonick 主音恆仔自編自導自演，就算台灣電影，《消失的情人節》橫掃金像獎，笑中有淚，全部都好值得大家入場睇，不過多得香港人個無能政府，結果戲院被封，大家放工想食餐好飯都難，仲有好多朋友失去工作收入。
戲院都要閂門，影評仲需要寫？好彩尹某並非靠寫稿維生，否則開飯都有問題。編輯有提議寫美劇，我個人其實接受，反正大家都已經放棄本地大台，人人上網睇 Netflix。不過本欄叫得【吾港戲】，只要一日有得揀，當然講本地製作優先。
同 Netflix 介面一模一樣，杜汶澤喱騷終於上線，你可以揀$60 月費，又可以揀 $600 年費（慳兩個月月費之餘，仲可以睇返《香港企硬》個騷），老老實實，就算 $800、$900 甚至 $1000 以至$1200 我都會撐，因為杜汶澤講得非常好：「我要娛樂有得揀」。
今時今日，香港連自由都一日比一日少，難得大家生活裡面，仲有幾樣可以有得揀，就要珍惜機會，例如 cut 有線（老闆毀滅香港新聞自由，然後仲要英國賣樓），例如訂《喱騷》。
你有去九展現場睇《香港企硬》，開場之前就一定睇過《黃秋生大師班》贊助個《黃秋生大師班》預告，非常期待。交過年費之後，當然第一時間睇。
一集 22 分鐘，第一季第一集，其實主要介紹 6 位學員，先由各人在黃秋生面前自我介紹，再加上各人在幕前接受訪問，然後由秋生逐一品評，尖酸刻薄難免，否則點會好笑，當秋生提出要大家「半真半假」再自我介紹一次之時，老闆杜汶澤終於出場，親自示範一次，亦講出今集金句：「加入亞視就係為咗要離開亞視，中國人出世就係為咗做美國人。」
單單兩句，今個月月費已經翻本。
不過老老實實，單睇第一集，最好睇不單止有黃秋生同杜汶澤，其實監製田蕊妮幾次開口都非常突出，至於六位學員，暫時發揮一般，好期待下一集呢。
不過我更加期待，杜汶澤喱騷可以成功，令觀眾有真正選擇，因為香港整個娛樂圈一早已經同個社會脫節，傳統電視台以至電影公司話事人全部有病，尸位素餐，影衰香港，而本地年青一代根本大把人材，喱騷幕後團隊正正最佳證明。
作者簡介
行內人會視為行外人，行外人又會視為行內人。做過電影主創，又做過電影媒體，仲做埋電影教育。未天真到相信電影永恆，亦未灰心到認為香港電影玩完。不過一句到尾，身為電影觀眾，曾經叫做電影學生同畢業生，與其要做電影人，倒不如先透過電影學做人，首先要做個好人。
----------------------------
按此訂購「壹週刊 X 勁揪體 2021 和你壹起撐住香港」月曆
----------------------------
守住新聞自由 和你撐壹週刊計劃 每月港幣$300起
按此了解更多
-----------------------------
英國移民、升學、就業、買樓生活資訊！
立即加入「走佬去英國 － BNO 5+1 移民資訊研究所」
來源 source: http://nextplus.nextmedia.com
|
鍾意就快D Share啦！
|
|
|