鍾舒漫和鍾舒祺是兩姊妹，她們年齡只差一歲。
由小到大，她們都遵父母教導相親相愛。35年的姊妹情，當中有笑有哭有淚，鍾舒祺婚前婚後都黐住家姐，她們日前接受《蘋果》專訪，竟大爆姊妹至今都共同理財，小至老師獎的一粒糖和長大了賺的一分一毫都會開心share。
36歲鍾舒漫是「鍾氏財政大臣」，妹妹鍾舒祺賺到錢悉數上繳，再由家姐分配：「如果家姐收入比較好，佢會分畀我；如果我收入較好，我也會分畀佢，我哋冇計較，基本上家姐管財。」鍾舒漫劃死每人每月限額零用：「我每個月畀祺祺5,000蚊，自己都拎番相同數目，呢啲錢夠佢搭車食飯，如果嗰個月我想慳啲，我就畀佢3000蚊。」不過做了人妻的她近日考慮分家，她指老公、樂隊Ever結他手李恆韜的收入都交她理財，兩邊有錢收的她從不缺財：「好彩我有老公獨立養我，人生第一次有私己錢，佢每個月將所有人工畀晒我，有時睇番存起嚟嘅數目都唔錯，我又每月又畀番零用老公。老公好慳，唔出街唔貪靚，只係玩結他，有時夜返揹住個結他都唔捨得搭的士。為食嘅我成日用錢買嘢食，有時我都會有內疚。」
鍾舒漫強調姊妹共同理財是為全家大局着想，「我緊張睇住盤數，想畀阿妹同妹夫買樓。」鍾舒祺補充：「各自買到樓係我哋人生願望，而家家姐搞掂咗層樓，跟住輪到搞埋我嗰間，我哋各自有樓後就會租出去，然後再租間大啲接埋父母一齊住。」鍾舒漫與家人2017年以1,500萬在元朗置業，她們去年都一直吼着樓巿為鍾舒祺達成「上車」願望，無奈錯失良機，她們今年會再留意。
向來對感情事低調的鍾舒漫，去年爆出跟陳潔玲的一場金錢糾紛，意外令她與MV導演男友林灝軒（Steve）密冚的兩年地下情曝光，向來愛衝出來護姐的鍾舒祺說：「姐姐拍拖唔使過我呢關，我接受大家有唔同選擇。」有指鍾舒祺由抗拒到接受了Steve：「我對人都幾gentle，姐姐揀了嗰個人，就算唔喜歡，我都會畀番佢九分面，亦會花時間去睇吓。」
最後Steve成功過鍾舒祺這一關，她可會催胞姊趕快加入做人妻？鍾舒祺答：「媽咪好想快啲拉埋佢哋，我唔會一齊催，佢哋有乜嘢決定都會尊重。」鍾舒漫不心急出嫁：「我對婚姻有好大期盼，我覺得婚姻會support人生好多嘢，一定要思前想後，唔同老人家想我哋有名份先，又想我哋快啲有小朋友。」可會順應母親要求加快進度？「要雙方，大家要對前景有相同諗法，要有計劃，遇上阻住前景都要大家改善。」鍾舒漫對Steve讚不絕口：「佢非常乖，雖然感覺小朋友啲，但佢似海綿，同佢講咗好肯學，我欣賞佢進步好快。」若10分滿分，鍾舒漫說：「我畀8分，佢仲要改吓啲小習慣。」鍾舒祺則給7.5分：「剩下2.5分，我諗要一齊住吓先知道。」鍾舒祺開心胞姊公開地下情，「佢終於影相可以一齊出鏡，唔係只係揸機。」鍾舒漫則保護男友指他是幕後要低調，不排除會玩瞞婚，待被踢爆才會承認。當轉到生仔話題，人妻鍾舒祺要搶生：「放心，壓力喺我度，等我頂。」她計劃置業後兩年便生BB，這個妹妹結婚生仔都要快家姐一步。
鍾舒祺和鍾舒漫絕對是姊妹情深，二人不會有隔夜仇，即使遇上意見不合，拗完便算數。鍾舒漫說：「我人生最開心有呢個妹，我可以咩都冇，但唔可以冇呢個妹妹。」鍾舒祺用為姊姊擋子彈做比喻：「擋刀、擋槍就梗係唔使講，哈哈，咁樣嘅話我就一定死先，唔使諗。」
兩人都入了娛圈，她們有共同音樂理念，近年更在YouTube開channel分享搞笑片，由構思、製作、拍片到剪片全部一腳踢。鍾舒祺謂拍片過程已笑料百出：「我哋好多烏龍嘢，拍嘅期間已好好笑。」鍾舒漫也說：「記得第一條片係始於2014年，我哋喺屋企食完飯無聊，覺得有個對話好搞笑就用手機拍低放IG，點知幾好反應，大家之後覺得好玩就越拍越多，亦越嚟越認真，添器材學剪片。」訪問當日，她們都帶齊架生出動拍防疫笑片。如何決定題材？鍾舒漫說：「我比較執着，想每條video都帶出一個好嘅訊息，祺祺偏向即興，佢覺得唔使咁認真，諗到咩嘢就拍咩嘢，最緊要係令人有同感。」當共識了題材，兩姊妹便分工，鍾舒漫說：「祺祺最輕鬆，佢度橋，我做埋剪片加字幕，後期工作多啲。」
撰文：比華利
攝影：沈健程
攝錄：廖達燊
場地：顏府御膳
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|