ViuTV節目《全民造星》監製花姐（黃慧君）曾說：「呢個節目係要搵一個偶像！咩叫偶像？即係唱歌、跳舞、演戲任何一方面，都會令到啲女仔為佢尖叫。」
誠然，要在眾多被指是「甩皮甩骨」的參賽者中，找到一位亮眼而有認受性的偶像，是一項艱辛的希望工程，不過正正是參賽者的不完美，才能令觀眾在節目過程裏，和參賽者們同笑同哭。事實亦證明，姜濤和MIRROR的成功，印證了「造星」的潛力。而今屆《造星III》，無論話題性和觀眾投入度，均比前兩屆優勝，當中剛過20歲生日的ANSONBEAN（陳毅燊），賽前一直被外界視為冠軍大熱人選，IG followers亦由賽前數千人躍升至現時4萬人，憑孩子氣笑容及「bean bean有力」的舞功，吸納一批「豆迷」之餘，決賽前已狂吸廣告搵銀。
ANSONBEAN最終只獲季軍，令不少「豆迷」感到失落，他日前接受《蘋果》訪問時，亦承認當晚表現拘謹和用力過度，成為失分死因。
「覺得自己唔夠淡定，表演要剛柔並重，我就一味『爆爆爆』用盡力，又收唔返，臨場發揮唔好。當你緊張時，都會影響表情同演繹，台下評判會睇得一清二楚。」他賽後檢討分析當晚緊張原因，其中一個因素是受台下的「觀眾」影響所致：「正確嚟講，當晚除咗評判外，其實係冇觀眾，只得螢光棒，而表演過程中，表演者係會不斷將啲energy射出去，但嗰晚感覺好似冇嘢返嚟，我估如果有現場觀眾可能會好好多，有佢哋鼓勵甚至一個半個反應，相信對每位參賽者都有幫助。」雖然未能登上冠軍寶座，不過ANSONBEAN卻認為這半年來，學到和累積下來的經驗終身受用，坦言當初入到10強已超出自己所想。
ANSONBEAN家住九肚山，媽媽林佩佩是城中著名跳舞導師，早在30幾年前已經開設舞蹈學校，桃李滿門。有如此猛料媽咪，記者笑ANSONBEAN早已贏在起跑線，他卻反指媽媽當初堅決反對他入行：「我細個時媽媽返工好忙，佢唔想留我喺屋企，咪帶埋我去表演囉，擺咗架BB車喺台前面，就係咁唔多唔少都會影響到我，直到Micheal Jackson過身後，同埋喺電視睇到張國榮一個表演，就開始鍾意跳舞，但對我媽媽嚟講，佢反而有啲抗拒，唔係咁鼓勵我做呢行。」
原來Bean媽之所以反對，是當初希望阿仔在英國大學畢業後，能在當地搵工落地生根，結果ANSONBEAN兩年前讀完中學後火速飛返港，一心一意進軍演藝界。
「其實當時英國嗰邊已經有大學收咗我，不過我最後都冇聽阿媽話，返咗嚟，因為讀完嗰兩年，更加肯定自己條路，覺得香港呢邊節奏快啲，而且lifestyle亦都啱我多啲。原本有諗過返嚟考演藝，但發現自己唔適合讀演藝呢科，而係要踩入去親身去試，咁我都鍾意business，而家就喺科大讀緊business marketing，反正叫做畀多條路自己行。」
ANSONBEAN其中一個「殺着」，便是其招牌矇豬眼和帶有親和力的笑容，訪問中，每當面對不懂招架的問題時，ANSONBEAN總會以這個「人畜無害」的笑容招架，就如問他戀愛問題時，他一味靦腆地笑，依依哦哦一輪，依然是詞不達意：「即係……係囉，唉！算啦，純粹我都冇拍拖，以前係有嘅，但而家冇囉，冇特別諗，亦唔打算拍拖，可能等我老啲先啦。」問他有沒有妹妹仔埋身？他耍手擰頭說：「冇呀冇呀，我get唔到呀！」問他可有心儀理想對象？他繼續兜圈說：「其實我之前都諗過訪問會問我呢啲問題，我嘗試諗答案，但都係諗唔到，外表、心靈？咁當然兩樣都想要」即使時代進步，戀愛對偶像來說始終是忌諱的話題，就如ANSONBEAN，無論記者如何旁敲側擊，他都保持着這個「無辜臉」，20歲仔，前途無量。
在《造星III》節目中，B組導師彭秀慧曾透露在眾多參賽者中，唯一見過ANSONBEAN是會看書的。訪問當日，記者突擊檢查其背囊，發現他隨身攜帶的英文書《The 7 Habits of Highly Effective People》，封面已被揭到相當殘舊。他說：「其實本書嚟嚟去去睇咗幾次都未睇晒，始終比賽時間好浮動，而家會慢慢pick up返自己嘅生活節奏。」
ANSONBEAN透露書中有不少教人管理自己的貼士，而他對日常生活的規範亦頗多，對飲食節制猶如禁慾一樣，零食少掂，蕉不離口，「豆迷」知他喜愛食蕉，更會奉上一梳梳蕉當小禮物。他說：「蕉嘅熱量比零食低兼飽肚，唔容易致肥嘛！」至於不少都市人習慣一瞓醒就要睇電話，他亦說：「比賽嗰時我都慣咗一起身就機不離手，呢啲小習慣會影響到我其他方面，例如約人會多咗遲到，所以而家要習慣番一起身唔好睇電話，要去刷牙、沖涼同食早餐先。」
採訪：王梓嫚
攝影：陳慧安
攝錄：廖達燊、馮嘉銘
Hair : Alex So @ The Attic
Make up: San Chan
Outfit : Calvin Klein Jeans
----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|