熱爆娛樂: 3歲Lucy變姜糖睇姜濤片激讚:超級靚仔! #姜濤

2021年5月8日星期六

3歲Lucy變姜糖睇姜濤片激讚:超級靚仔! #姜濤

在芸芸星二代當中，李燦森的「網紅囡囡」李元元（Lucy) ，一直人氣高企。早前Lucy 更憑住《BOOMBAYAH》一舞成名，獲韓國天團Blackpink的經理人「認證」，年紀輕輕已衝出國際，認真巴閉。原來除了Blackpink之外，Lucy都好識貨，訪問當日，Lucy睇到人氣偶像姜濤的MV時，竟然大讚：「靚仔呀! 超級靚! 」

母親節將至，平日與囡囡齊齊放笑彈的李老母（Sophia），一提起剛剛過身的媽媽，眼淚就像缺堤一樣。慶幸在難過的時刻，有寶貝女Lucy在身邊，成為她的支撐點。當日Lucy見到媽咪爆喊，即時上前遞紙巾安慰，十分窩心。見到媽咪喊，Lucy都拎起紙巾抹眼淚，但就搞笑話：「我冇喊呀！我抹啲eyelash 咋！」當堂令阿媽破涕為笑，Lucy不單止是笑彈，更是媽媽的止痛藥。

吸納不少星粉

3歳的Lucy搞笑可愛，而且表演慾強，假如有一日被睇中，要去韓國接受訓練，李老母會否支持？

「如果佢真係好想去做，我當然唔會阻止佢，因為佢長大後就有自己嘅選擇，我只不過會喺背後支持佢，但要點樣選擇，我都會容許佢。如果你見到佢真係好想、好有決心，咁樣我一定會支持佢。」

貴為小人氣王，IG坐擁25萬followers ，Lucy出街亦吸引晤少途人注意，要求影合照。

「係呀，越嚟越多，可能好多人留意到佢，所以喺街都有好多人搵佢影相。然後我會叫對方問番佢，因為當然係問番當事人，然後佢通常都會話可以。不過有時候佢都會拒絕，話唔可以。」

Lucy的粉絲群當中，亦不乏星級粉絲，當中長期給like的，包括鄭融，余香凝，最新星粉更有蔣家旻。

「我記得好似有一次喺街遇過佢，佢好開心，不過我唔知道就係佢，因為戴咗口罩同帽，然後佢話想同Lulu影相，之後隔咗一段時間，然後有朋友話俾我知，原來蔣家旻將合照貼上IG，我先至知道原來當日合照嗰個就係蔣家旻，發覺原來一個人戴上帽同口罩，真係完全無可能認到佢係邊個。因為我對呢個女仔都幾有印象，又睇過佢演戲，本身幾鍾意呢類型，對於我嚟講會覺得幾特別，但無諗過自己居然唔認得佢，覺得自己好失敗⋯⋯其中盧覓雪都好搞笑，又係好似小粉絲咁樣，因為遇過兩次，兩次佢都好高興，不過其實好多人見到Lulu都會好開心。」

3 歲的Lucy 樣子可愛趣怪，成為網民的開心果，她的Ig 更是粉絲精神食糧。



Lucy提早同媽咪慶祝母親節，更錫錫媽咪，場面溫馨。



Lucy 擁有唔少星級粉絲，當中包括蔣家旻。



早前憑住《Boombaya》一舞，得到Blackpink 經理人「認證」。

大讚姜濤靚仔

當「Bb界最紅KOL」見到「超級偶像」姜濤時，竟然大叫：「靚仔呀!超級靚！」人仔細細，已經非常有眼光。除此之外，Lucy平日同李老母的互動交流，亦十分惹笑。問到李老母是否要經常忍住笑幫囡囡拍片？

「當然啦，因為佢本身個樣已經好卡通，再加上有時候表情的確好搞笑，所以要忍笑揸穩手機。不過有時候都真係忍唔到，你會聽到我喺背後笑咗出聲。」

早前Lucy被李老母拍下笑阿媽口臭的表情，訪問當日，Lucy亦大爆爸爸的秘密。「（爸爸個口臭唔臭？）都臭。（咁Lulu 呢？）Lulu個口唔臭。」

幽默感遺傳阿媽家族

一向貪靚又熱愛公主裙的Lucy，當日一見到玩具化妝品，即愛不釋手，更在鏡頭前傳授化妝心得。「首先要點點點⋯⋯然後都係點點點⋯⋯再然後點點點⋯⋯然後就搽嘴唇……」望著囡囡面上的藍色胭脂，李老母亦忍不住大笑：「BB呀！藍色嘅胭脂係史無前例咁靚，係咪呀？請問你自己有冇照過鏡？你去睇吓自己有幾咁靚？」

Lucy的IG大受歡迎，成為唔少網民的精神食糧。充滿幽默感的李老母，應記一功，原來李老母的幽默感亦是遺傳自媽咪。

「一定係遺傳自媽媽，同爸爸無關，因為爸爸係一位藝術家，唔係好識得同其他人溝通。媽媽講說話都幾搞笑，衰衰格格咁樣。」不過，Lucy似乎更加青出於藍，經常有天馬行空的想像，笑料百出。「（行山會有乜野睇架？）有Tiger 。（仲有咩架？）仲有panda 。（仲有呢？）仲有Lion 。」口齒伶俐的Lucy ，又會否經常跟媽媽鬥嘴呢？「有少少囉，不過又唔算係鬥嘴，只係類似一種情趣。你哋可能會覺得係鬥嘴，例如互相寸對方。」

對於教育方法，李老母一向主張讓小朋友輕鬆快樂成長，另一方面，尤其注重家教，同時亦有威嚴的一面。

「我對住Lulu都會有威嚴，不過之後會話番俾佢聽點解唔可以。下次再同佢講唔應該咁樣做，其實唔需要太惡，佢都會明白箇中原因，點解唔可以，然後就唔會再咁樣做。」