不是世紀絕症，不需要妙手仁心，但要保持愉快心境，老土啲，是性格決定命運。
「我由細到大都好收埋自己，因為唔識點樣用言語去表達，所以情感上係壓抑嘅。到成長到一個位，我就覺得，咁樣唔係辦法喎，一嚟自己會唔開心，二嚟會好想踏出Comfort zone（舒適區），去打破乜都屈晒喺裏面嘅狀態。」
三十八歲的李佳芯，於三十歲時就決定作出改變。
「要打開自己（心房），先可以感受到更加多。呢個世界，唔會去迎合你o架嘛，所以就要去擴闊自己嘅世界。」
於是她便藉藝術抒發情緒，自己為自己作藝術治療。「做演員係其中一個方法，我學畫畫、書法，再喺舊年年尾學埋陶瓷。都係我業餘嘅時候，一種減壓嘅方式，亦都係一個我尋找自己內在世界嘅途徑，做人唔可以只係喺自己嘅世界入面Loop（循環）o架嘛，要同人世界接軌。」
要自我感覺良好，有時候也是一種學問。看着自己的陶瓷作品，色彩斑斕，李佳芯十分滿意。
忽然覺醒
李佳芯學畫、學書法、演戲，至最近的陶瓷，全部也是藝術，是她實踐兒時夢，並非扮高深。
「我讀書嘅時候，好想讀Art（美術），但屋企人覺得唔實際，話要讀就梗係讀商科，出嚟可以做秘書、會計。但係我經過美術室，見到啲人喺度整陶瓷，轉轉轉就可以由冇到有，造到一樣嘢出嚟，我就覺得係好Amazing（奇妙）。
「直到出嚟做嘢，我先至開始學畫畫、寫字，到疫情我得閒啲，就做一啲自己想做，但之前冇做過嘅嘢，寫咗書，就終於到陶瓷嘞！我上網搵，喺屋企附近學，拉咗我人生第一隻坯出嚟。」
自去年開始，除本業演員外，李佳芯以著作、畫作表達自己，這次她以陶藝作品「遊夢童心」，參與「陳校長免費補習天地」舉辦的藝術展，既抒發內心世界，又可以行善。
「我不嬲都用好自閉形容自己，就算人哋誤會我，我都會覺得，就算我解釋人哋都未必明o架啦，於是就選擇唔講，自己Block咗自己。但其實我係一個好感受性嘅人，裏面好動盪、好多感受；但外面睇就好似乜事都冇，完全睇唔出。
「我到好遲先做演員，做咗之後，我係開咗竅嘅，演戲之外，造陶瓷嘅過程我都好享受。就算佢（作品）有好多瑕疵、好多裂紋、上色又唔均勻⋯⋯」
重要的是，她從自己的作品，領悟到的東西。「我想表達嘅，係好似一個細路仔，去到遊樂場入面，喺一個開心嘅狀態尋找，到最後成功與失敗，並唔重要，要Enjoy整個過程。」
事業上，她自稱已處於「有劇播咪播」的佛系心態，今年《愛美麗狂想曲》及《智能愛人》先後播出，她也處之泰然。
|
鍾意就快D Share啦！
|
|
|