去年8月榮升爸爸嘅歌手呂方，今年首第一次以爸爸身份過父親節，佢喺社交網大晒多張家庭，以及與囡囡到主題樂園玩嘅相，化身「推車手」推住囡囡周圍去，非常溫馨，佢更留言表示：「寶貝兒，等着你叫我一聲爸爸！」而新手媽媽余香凝亦為老公慶祝首個父親節，佢罕有於社交網大晒一家三口全家幅，並大讚老公幫得手：「由無從入手變成換片達人，以後poo poo都要叫爸爸嚕。」
另外，林溥來（Patrick Sir）老婆關宛珊4月為佢誔下囝囝「洋葱頭」林若嘉（Preemo），升呢做人父嘅佢不時於社交網晒出囝囝點滴，紀錄成長，佢今日上載多張家庭照，當中有一家三口全家福，亦有佢獨自抱住囝囝，溫馨非常，並配以長文發表感受：「睇住洋葱頭好似氣球咁一日一日脹大，成功感好大，責任感更大。覺得老婆好偉大，真係要錫佢多啲。Preemo每次發出新嘅聲音，都令我哋好興奮⋯⋯除咗喊聲。成日提自己，唔好忽略Don Don。一家四口去咗幾次街，每次都好開心，好有family嘅感覺。每次收到老婆send嚟嘅BB相或片，都好似傻佬咁自己對住個電話笑。每日好早起身返工，放工返屋企再開工。日日超攰唔夠瞓，但係內心又勁開心。」最後為天下父親打氣：「各位爸爸，我哋要默默地（你係爸爸你明嘅）加油，幾辛苦都要撐落去，面帶笑容地成為老婆嘅最大支援，子女嘅最佳榜樣。父親節快樂！」
來源 source: http://hk.on.cc
|
鍾意就快D Share啦！
|
|
|