2021年6月3日星期四

望子成龍激讚囝囝畫作　林盛斌浮誇演技獲封影帝 #成龍 #林盛斌

望子成龍激讚囝囝畫作　林盛斌浮誇演技獲封影帝

Bob睇到囝囝畫作即爆發「神級演技」狂讚！

一班「星級B仔」真係好可愛！所謂「孻仔孻心肝」，2017年終於追仔成功的林盛斌（Bob），可謂錫到個細仔林道申（Jaye）燶，仲不時於社交網分享囝囝萌照與生活點滴，今日他又於IG上載了一段影片，片中一開頭Jaye靦腆地拎住幅畫衝向爸爸，然後彈彈吓向爸爸表示：「我自己（畫）㗎！」語畢Bob即爆發「神級演技」瞪大對眼，並一邊扮驚訝掩嘴一邊高呼：「咩話？唔係呀嘛！嘩！咁靚嘅？！你畫㗎？你講真定講笑呀？」

結果讚到Jaye都勁唔好意思趴喺張枱度答：「講真㗎！（Bob：你有冇講大話㗎？）唔係」接着Bob再加多兩錢肉緊說：「嘩！好靚呀大佬！好誇張呀！黐線！嘩！你超勁囉！」見爸爸咁欣賞自己的作品，Jaye都情不自禁哄埋Bob度獻吻，但當下Bob冇為意擰歪面，繼續「鑑賞」囝囝的大作，又「Dum」晒腳一輪嘴讚：「好犀利呀！係黑色嘅彩虹呀！」Jaye就冧爆挨落爸爸身上。

Bob一睇到即扮驚訝掩嘴兼吊高八度說：「嘩！咁靚嘅？！你畫㗎？」讚到囝囝都勁唔好意思。

Bob以「親子育兒速成班」為題留言：「好耐之前，曾經聽過一個育兒專家講，佢話多啲讚美同嘉許你嘅小朋友，佢哋嘅童年過得開心，長大後會更成功。不過，可能我想佢哋好好好好好成功，所以我係用力咗少少，誇張咗少少........」對此，一眾網民紛紛笑爆說：「好浮誇呀爸爸」、「影帝」、「最佳男主角」、「演技超晒班」、「笑到抽筋」等。

另邊廂，林芊妤（Coffee）亦晒一家三口溫馨照，但似乎兩父子的甜蜜互動令她好妒忌！事緣他們去酒店Staycation，慶祝一家之主翟志榮生日，未料影合照時，瞓喺老公大髀的Coffee叫父子錫她，結果按下快門一刻，翟志榮與囝囝翟德彥（翟伯伯）竟「自私」咀嘴，激到Coffee追問：「沒有我!!!?

Not allowed!!!」伯伯即耍冧笑謂：「其實我眼裏只有🎂（蛋糕）」