《中女唔易做》試做「炒散王」 楊思琦開心婚後有更多私人時間
楊思琦最近在ViuTV真人騷《中女唔易做》體驗做「炒散王」，大學畢業即選港姐入行的她，首次做其他工既新鮮亦覺困難，令她憶起年前要母兼父職，要照顧女兒卓穎又要周圍飛工作，去年結婚後終有丈夫幫助照顧一對仔女，可以向仔女「請假」唞唞氣的她，更跟朋友試玩恨了多時的Wakesurf（無繩滑水）。撰文：杜淑霞 攝影：譚壹致 服裝：Perme
思琦在《中女》中嘗試了花店店員、珍珠奶茶店店員、生果店店員和派傳單，她認為4份工都能勝任，但最不想做派傳單，「我怕嘈，喺港鐵站門口人來人往，好頭暈，企得耐隻腳會好辛苦，但係我冇諗過沖嘢飲都要兼顧埋洗廁所，呢個要過自己心理關口，呢次體驗先至知要兼顧埋呢啲嘢，好彩我都應付到。」
「請假」玩Wakesurf
有了這次工作體驗，令思琦更加佩服一班職業女性要兩邊兼顧，亦令她想起自己身兼父職的單親日子，「我都曾經有咁樣嘅經歷，有時唔知點樣安排小朋友，好想擺佢喺身邊，又要出埠見唔到，就算我返嚟做全職媽媽去照顧佢，都係好辛苦，因為只有一個人去照顧佢，有另一半嘅幫忙係會好好多。（當時點同囡囡解釋冇爸爸？）呢個家庭裏面我就做咗兩個角色，穎穎都會知道，𠵱家更加好啲，佢會開心咗，多咗個人（後父）關心。」
思琦承認婚後反而多了Me Time，最近更開心跟朋友出海玩Wakesurf，「最近一次幾好玩我去滑水，平時我都唔係咁活躍主動，但我成日睇到滑水嘅片，或者碌IG會見到，我真係好有興趣去試吓玩，咁啱朋友講開，好似我心裏面條蟲咁，最後擺低啲小朋友去玩，真係好開心。（請假？）係盡量去安排吓去唞啖氣輕鬆吓，都係一個好嘅開始，做到自己鍾意又未試過，我都好想再試吓，好玩好刺激，算係畀自己一個獎勵。（仲有咩想試？）想學吓空中瑜伽，幾好玩，嚟緊會開始去尋找吓，之前真係冇呢個諗法。」
來源 source: http://hd.stheadline.com
|
鍾意就快D Share啦！
|
|
|