香港24歲「劍神」張家朗喺東京奧運摘下香港史上首面奧運劍擊金牌，成為香港之光，當中曾代表香港出戰奧運嘅方力申（小方），今年都有份隨無綫攝製隊直擊奧運實況，佢尋晚（26日）親眼見證住張家朗奪金，仲立刻開Live做後台直擊，佢仲乘機問對方拎簽名Tee，又伸手掂下屬於全香港人嘅金牌，開心到佢呢！
不過有得近距離見張家朗嘅「代價」，就係佢去到凌晨一點半先有得食飯，佢就出Story自爆去緊搵24小時食店買外賣醫肚，買完食完再Hea吓就已經清晨4點幾，佢都仲未瞓，個天就已經光晒，佢仲自爆要喺當地時間今日（27日）9點前就出發撐東奧女子200米自由泳準決賽嘅香港代表何詩蓓，最終「女飛魚」何詩蓓游出1分55秒16佳績，排小組第2名，總成績亦同樣以次名殺入決賽，打破個人最佳奧運戰績，創下港隊歷史，似乎方力申係港隊「吉祥物」啵！
本文作轉載及備份之用 來源 source: http://hk.on.cc
|
鍾意就快D Share啦！
|
|
|