歌手薛凱琪（Fiona）前日（12日）晒出同天后容祖兒及王祖藍等好友慶祝其40歲生日嘅合照，畫面見佢又Cake又酒相當盡慶，點知一日後，佢尋日（13日）就自爆右下腹位置劇痛足成晚，最後決定入院檢查，醫生為佢吊止痛藥及做電腦掃瞄，發現原來係腸炎：「報告出咗唔使割盲腸，痛咗大約13個鐘，腸某個部位發炎，所以要留院觀察，吊鹽水同其他藥。我12號8點後已經無食過嘢，醫生話一直唔可以食嘢同飲水，一直吊鹽水睇下會唔會自己好，如果好得較慢會喺鼻插管落腸嘅位置，將入面嘅氣同水抽出嚟。」
至今早（14日），Fiona表示醫生堅持要等佢成功排便後先出得院，但超過兩日半未進餐令佢毫無便意，更加令佢壓力加大，仲話聽醫生建議喺病房內多走動，望可以成功排便，如果唔係佢就有可能要做手術。唔少圈中人都Keep住留言撐佢，好似契媽余安安、關智斌、王敏奕、余香凝、張繼聰、林家謙等，齊齊集氣祝佢早日出院。
本文作轉載及備份之用 來源 source: http://hk.on.cc
|
鍾意就快D Share啦！
|
|
|