吳麗珠憶與許冠武拍拖12年 結婚前才反思非那杯茶
至今仍單身的吳麗珠（珠女），近日接受電台《舊日的足跡》訪問，過去她只曾跟陳百燊和許冠武扯上關係，她說：「我有好多段感情，只係嗰兩段被人知道，不過我唔抗拒，我見過有人70歲結婚，我未試過，可以試吓。結婚唔一定等於幸福，當年同陳百燊係訓練班同學，一齊幾年，分開咗我唔想搬返屋企，余慕蓮（余毛）就租咗間房畀我住咗一年，所以我好錫余毛，佢係我恩人。」
至於與許冠武一齊12年，應該好穩陣？珠女卻說：「可能我唔係要求呢一樣嘢，我哋拍拖唔係Sam（許冠傑）介紹，因為我哋（與許冠武）都鍾意夜蒲鍾意飲酒，分開咗先反思原來我根本唔喜歡嗰種類型，我着重玩要投入之外，做事都要認真同有責任感。當年我哋計劃去拉斯維加斯結婚，連主婚人都約好，但嗰陣我剛出嚟做地產，見到外面嘅世界，感到對方未必適合自己。我同佢傾，佢似乎冇乜反應，我再表示我要離開，佢都冇反應。」
珠女續謂：「我仲記得我唔想佢媽媽唔開心，因為我哋同佢媽媽一齊住，於是我好似螞蟻搬家，每晚返去偷走一啲衣物，我唔想佢見我一日之內搬走所有嘢，因佢媽媽都錫我……後來我冇交代，但我都有出席許媽媽同許冠英嘅喪禮，因為我覺得我哋兩個人嘅事，同佢嘅兄弟姊妹同媽媽冇關。」
本文作轉載及備份之用 來源 source: http://hd.stheadline.com
|
鍾意就快D Share啦！
|
|
|