2021年10月15日星期五

許志安杜德偉撞樣事件重演銀白色頭髮唔一定係保錡 #保錡 #安仔 #杜德偉 #許志安

許志安杜德偉撞樣事件重演銀白色頭髮唔一定係保錡

保錡同肥仔都被人認錯，但戲院黑麻麻，又戴晒口罩，認錯都唔出奇。

人有相似，藝人撞樣事件時有發生，最經典一次莫過於有網民將許志安認錯成杜德偉，仲話：「條友好寸，叫佢杜生都唔睬人。」而C AllStar成員陳健安（On仔）又試過被人誤認係曹永廉。

最近旅遊達人、網絡主持兼作家，總之就瓣數多多嘅前DJ雲海，日前就喺社交網出咗個Post，話去睇《毒魔》IMAX特別場嘅時候勁驚喜，因為右手邊坐咗幾個ERROR同MIRROR 成員，睇完戲佢就硬着頭皮問阿Dee影咗張合照，跟手就再數遠少少嘅Lokman、Alton，但由於戲院好黑，大家又戴住口罩，佢就見到疑似保錡同肥仔嘅身影，仲偷拍咗一張相，但佢朋友就堅持話唔係，叫網民幫手認一認。

網民即發揮「柯南」嘅偵探頭腦，都覺得唔係好對路，話肥仔好少戴眼鏡，另有人話見到保錡當晚其實係同女友沙律一齊去睇，所以應該唔係佢哋兩位。最後兩位當事人出嚟認頭，原來染咗白色頭髮嗰位唔係保錡，而係另一位歌手安俊豪，佢尷尷尬尬咁話：「HI EVERYONE!!令大家失望，白色頭髮係我嚟😂😂。」仲順帶hard sell新歌《失蹤72小時》，好識借機會宣傳。而「肥仔」其實係香港樂隊神奇膠主音日新。