影帝任達華自6月開始「留守」內地工作，近日因再接拍新戲關係，預算要再逗留多3個月始能返港。「行走江湖」多年的他，亦笑指是離港最長的一次：「所以都好掛住香港同屋企人，好彩依家科技發達，可以用軟件同佢哋保持聯絡，一日至少通電兩次！」
華仔又指囡囡任晴佳普通話相當了得，搞到他奮起「挑戰」：「近日主演嘅內地電影，我都要求自己嘗試配埋音，希望普通話能有所進步。（留咁耐有乜最難忘？）依家北方開始入冬落雪，我覺得太凍，所以呢兩日飛咗落中山避寒，順便曬多啲太陽，皮膚黑啲為下套戲角色造型做好準備，所以呢幾日溫差好大，由零下幾度變二十多度。」
內地工作期間，華仔空閒時醉心畫畫，除用紙筆繪畫外，更用平版電腦塑造出一幅幅新穎創作：「我都有留意到香港開咗間博物館，好想快啲返嚟欣賞吓啲世界頂級藝術品，同埋快啲見返朋友同屋企人，開始思家喇。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
