視帝鄭嘉穎事隔5年回巢無綫拍攝台慶劇《星空下的仁醫》，身為兩子之父演繹「鬍鬚醫生」入木三分，被睇好有力3奪「視帝」。不過，他事業上近兩年卻為家庭放慢步伐，不惜犠牲大好「錢」途，他說：「疫情因為要隔離，所以呢兩年都冇返大陸拍戲、真人騷、商演，之前拍《星》見少咗個大仔，佢已經唔理我，之前我日日同佢去公園玩，佢好黐我，令到我好傷心，如果上去就冇咗兩個仔。唔可以乜都有，依家會選擇家庭。」
講起兒子，嘉穎覺得大仔表演欲強，比較似他，細仔則似老婆陳凱琳，雖然擁有最強基因，但直言與太太也不讚成兒子入行，他笑說：「大仔連乞人憎都似我，其實好矛盾，唔想佢哋做呢行咁辛苦，所以唔想咁快帶佢入行，廣告亦都推過，等佢18歲之後自己揀。」他笑謂現時最希望擁有時間停頓掣，不想兒子長大得那麼快，因現階段是最有童真、最可愛。至於再生BB，他則笑說：「順其自然啦，屋企有兩個小霸王已經好辛苦，喺屋企我都變咗小貴子。」
嘉穎分享要擁有幸福家庭的「秘訣」，他笑說：「所謂Happy Wife，Happy Life，老婆唔開心，你都唔使旨意開心。我經常同佢講，覺得開心就去做，就算想拍劇都支持。佢平衡得好好，亦都想多啲時間陪小朋友，所以揀啲冇咁花時間嘅工作，佢真係好叻，係一個200分嘅老婆同媽媽。」
擁有美滿家庭的嘉穎，直言現在是人生最開心的時間，他說：「依家人生最想追求係拍多啲令觀眾留下深刻印象嘅角色，反而比攞獎更甚。」對於再奪「視帝」則說：「唔係唔想攞，有獎當然係好大嘅獎勵。自己覺得鼓勵應該要畀啲新一代，一個獎可能會改變佢哋一生。」
服裝：Lane Crawford
本文作轉載及備份之用 來源 source: http://hk.on.cc
|
鍾意就快D Share啦！
|
|
|