「鬼王」梁思浩和無綫世紀破冰，18年後光榮重返娘家，主持東南亞首個通靈選秀、無綫全新節目《通靈之王》，構思相當新穎。節目中他私碌人情卡請得6位至具人氣，來自不同門派的師傅或玄學家級任導師圑，包括李居明、麥玲玲等，在14集節目中學員透過不同的考驗選出冠軍成為「通靈之王」，而節目有2集前傳先介紹比賽，之後14集節目正式開始選秀。
日前思浩接受東網專訪時表示：「比賽係就好似搵特異功能嘅人咁，譬如要佢哋用自己嘅方法，去估牆後有幾多個男人、女人，參加者全部都係有料嘅，佢哋會計到出嚟。」而香港只是節目的第一站，第二季開始則在東南亞，如新加坡、馬來西亞，作全球性選秀。至於參賽的候選「通靈王」，他直言連自己都感意外及驚喜：「好得意，15個參賽者，有電影明星、亞洲小姐、TVB藝人，又或幫泰王睇風水嘅，全部都平均30歲，我冇諗過，佢哋轉咗行，因為玄學風水好搵錢。」
思浩話真心欣賞這班「環璄不變，心態變」的年輕參賽者：「放開眼光，試多啲新嘅嘢，覺得原有行業賺唔到錢、冇去向，咪試吓其他嘢。」正如沒有人知道陳自瑤是「新一代配音之王」，當時他亦有讚過她具配音天分，所以他覺得：「唔試又點知呢？」
他還爆料，指節目中還有大班圈中令觀眾驚喜的好友撐場，近年鮮在無綫出現但觀眾一直期待的藝人，將會在特別環節跟觀眾見面，其中一位就是跟他相識23年合拍《雪山飛狐》的佘詩曼（阿佘）：「我打畀阿佘，點知佢二話不說話得，仲話我：『18年同無綫破冰喎，點解唔賀你呀！』佢依家喺成都拍戲，一返嚟香港就上我度，有啲嘉賓超過20年冇返無綫，佢哋個個都講我返無綫成為熱搜，原來大家咁有興趣，呢樣係意料之外。」
雖然外界對思浩重返無綫第一炮充滿期待，但沒有構成任何壓力，因為他再為無綫效力只為圓夢而非「求分數」，他說：「原來大部分人都鍾意睇大圑圓結局，感覺係家人返咗屋企。」但他沒有「返無綫返得遲」的感覺，因人與人之間要講緣分，冥冥自有主宰，否則若不是離開娘家，令他到有線、NowTV「深造」，助他取得「東南亞鬼王」之名，現終可載譽歸來：「大家覺得我今日可以咁光榮返去TVB咩？其實返嚟都遇上困難，但人唔係遇上困難就退縮囉，堅持到最後都會贏，每個人有條路，可以行遠啲，我唔會抹殺咗咁多年嚟喺其他電視台嘅功勞嘅。」對於回歸無綫後的感覺，他覺得：「既溫馨又陌生囉，好開心遇番啲舊同事，學柴九話齋：『人生有幾多個10年』。」
除返無綫任節目監製外，思浩已準備好兩個類似《金宵大廈》的劇本，不排除相隔逾20年再拍劇：「想我拍劇、做司儀都冇問題，新一代應該唔知我係拍劇出身，呢幾年我鍾意做創作，如果曾志偉要，我就畀劇本。」不過他亦有條件，就係要開心：「我喜歡同人合作寫劇本，仲要加入我哋嘅班底，要保住佢飯碗，可以集合黃宗澤、阿佘、吳家樂同苑瓊丹，當朋友聚會，要我再度多個劇本出嚟都得。」
Credit：
Sponsor Location：柏寧酒店
Markup：Mr Joe Chan Pak Cheung
Hair Stylist：Mr Billy Cheong by Hair Duo
本文作轉載及備份之用 來源 source: http://hk.on.cc
|
鍾意就快D Share啦！
|
|
|
