曾監製《降魔的》、《跳躍生命線》的方駿釗，本月尾將推出新劇《愛上我的衰神》，繼續貫徹其獨特風格，以不平凡包裝，帶出既感人又貼地的小故事感動觀眾。
《愛上我的衰神》故事設定新鮮，劇中主要場景分別是第一維度及第二維度，故事中的角色離世前全數於第一維度生活，離世後每人會獲發一張螢光咭，並在死亡使者帶領下乘搭「維度電梯」，由生前「所作所為」決定死後踏足維度，完美完成人生旅程的可直接通往第九維度，仍需努力的亡魂則要由第二維度開始修煉，學有所成後方能升呢，感覺就像打機一樣。看似偉大的故事背景，引爆點卻源於監製一個小小謎思：「有冇諗過點解成日唔見嘢？」方駿釗認為人之所以成日「唔見嘢」，可能是暗中被整蠱而不自知，因為這個想法，他創作了劇中「衰神」的角色！生活於第二維度的「衰神」，會以派「厄運」及「好運」方式「管治」人類，主角潘小渝（陳嘉慧飾）便是其中一名衰神，而她要「整治」的則是胡鴻鈞飾演的陳北河！
監製笑言咪以為「被厄運追著走的人很悲慘」，其實「負責安排厄運的人更悲慘」，唔怪之得Erica喺劇入面成日都要煩惱樣啦。
陳嘉慧夥拍胡鴻鈞談情，呢個配搭夠晒新鮮啦。
雖然並不是重要角色，但看得出Erica一臉的努力。
現年25歲的陳嘉慧（Erica）擔任女一，並夥拍近期成劇集搶手貨的胡鴻鈞共譜「跨越維度的人鬼戀」！12歲隨母親移居日本的Erica，操得一口流利日語，藝訓班出身的她雖然演藝年齡只有四年，卻先後憑台慶劇《解決師》的「陳佩慧」及《迷網》的「牛嘉碧」成功入屋，亦主持過《Think Big天地》及《醫醫，我不想再病了》等多個綜藝節目；加上樣子甜美可愛，一直盛傳是無綫力捧小花之一。
據知監製並不是一開始便鎖定Erica做女一，全因Erica夠乖才突圍而出，方駿釗說：「我一直對Erica有好印象，因為之前同佢合作《福爾摩師奶》，當時佢仲係訓練班。我記得嗰日天氣好熱，好多嚟客串嘅訓練班同學都搵位避太陽，但唯獨得佢企正烈日之下等候安排工作，而且全程零怨言。」方駿釗又指為了增加Erica仙氣度，專誠為其度身設計多個可愛造型：「我哋專登叫佢試吓紮馬尾，出嚟效果真係幾入屋同活潑。佢都好努力，拍之前專誠上堂學做戲，加上我哋花咗好多時間同佢研究劇本同角色，所以出嚟效果都可以嘅。」
劇中另一亮點是有「港版周子瑜」之稱的區明妙（Stephanie），年僅20歲的她曾因於《她她她的少女時代》中飾演田蕊妮青年版而備受關注，IG粉絲人數更超越五萬，以新人來說成績不俗。樣子同樣可愛的Stephanie，在劇中飾演生存於第一維度的學生妹，看似普通的身份，卻有著極不平凡的經歷，不但自小父母雙亡，更因孤苦無依而長年在學校備受欺凌，絕對是演技考牌之作！
區明妙飾演嘅角色孤苦無依，更經常被欺凌。
|
鍾意就快D Share啦！
|
|
|