圈中有唔少女星都鍾情Hermès，人稱顧老闆嘅顧紀筠亦都一樣，早前更拍開箱片介紹新入手嘅鱷魚皮Kelly 25，一句「nice」足以表達當中嘅喜悅。不過，顧老闆日前接受港台節目《安哥同學會》訪問時，提到入坑Hermès原來係因為一次好偶然嘅機會。「我以前從來未擁有過好多女士想要嗰個手袋，但好多朋友都有。有日我訪問品牌總經理『聽講你哋啲袋好難買。』對方話又唔算，於是我就問佢『如果我想要一個，你估得唔得?』佢就問我想要邊一款，因為當時我自己冇諗過將來會再買，所以就要個最高型號，之後唔知點解好似中毒一樣，得閒見到就買。」
顧老闆話自己其實用嚟用去都係嗰幾款，感覺似collection一樣。「我形容自己好似垃圾婆咁，因為我好鍾意儲嘢，(咁你係高級垃圾婆。)你錯啦 ，呢啲大家都覺得高級，但我係咩垃圾都儲，連shopping bag絲帶都儲，有一個紙箱咁多。」顧老闆表示由於自己有畫畫，所以一直想將「冇咩用」嘅嘢用嚟做一件大型藝術品，例如用絲帶做頭髮部分、護膚品用來做手、腳部分，但要完成呢件事都要有一定嘅量。「我先生成日都問，唔知我儲嚟做咩。我就同佢講，之後會有用。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|