2003年度香港小姐季軍戚黛黛淡出幕前多年，2016年與機師老公Calvin結婚後，佢時不時都會同一班港姐好友見面，不過今日（4日）凌晨佢就上載多張隔離營嘅相，原來佢嘅機師老公同最近確診嘅其中一位機師係密切接觸者，搞到佢哋舉家即刻要入住強制隔離營，生活計劃全被打斷。
喺佢晒出相中，就見到老公喺對面屋影住佢入營一刻，因為佢同老公要分房瞓，不過佢房中仍有電腦可用，亦有大大張床，加上枱頭有滿滿一枱嘅零食、杯麵、生果等，睇嚟佢哋都仲有嘢可以解悶，唔少網友見到戚黛黛呢個宣布都好擔心，紛紛留言叫佢Take Care。
戚黛黛接受東網訪問時，就透露早前老公同一位現已確診嘅機師一齊飛，因而被界定為密切接觸者，而佢只係同住家人，只需隔離4日：「我哋兩個都未有症狀，定期都會做檢測，暫時全部都係陰性。希望冇嘢啦，因為老公公司嗰邊唔係好Sure位機師係幾時感染到，不過穩陣起見就搵番晒最近一齊飛過嘅人，希望驗唔到Covid啦，如果驗到都冇計，不過老公都係高危一族，服務性行業。」
問到其隔離房間乾淨企理，接唔接受到居住環境？戚黛黛表示：「係呀，呢度Ok呀，唔知係咪因為我哋係新翼呢？我間房係兩張單人床，我將佢拍埋一齊，仲有個床頭櫃。我自己帶晒床單、被鋪、被袋、枕頭嚟，咁個樣就好似舒適啲，但其實佢呢度都有提供畀我。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|