前「亞姐」冠軍翁虹趁新年影全家福，不過佢哋呢輯相，唔係普普通通着晒啲紅色衫，拎吓揮春，行埋去桃花度，影出啲新年氣氛就算，而係着晒民國衫，坐喺張酸技椅度影咗輯懷舊風相。
嗰個翁虹狀態奇佳，面上零皺紋，着咗粉綠旗袍時，身材玲瓏浮凸，舉止又優雅，十足30歲出頭；而個樣似台灣女神陳妍希嘅囡囡Crystal，雖然只得14歲，但深得靚媽嘅遺傳，換上粉紅旗袍時，身材都幾流線，加上紮咗兩條鬢辮，好甜、好少女，一家三口都係靚人一族。
翁虹接受《東網》訪問時，佢話：「一直都好想影輯精緻嘅上海風情相，我哋為咗呢輯相，用咗成個月時間籌備，仲食咗成個禮拜健康餐。」佢又話嗰日佢哋一家三口影相前去打疫苗，佢同囡囡過程好順利，但係佢老公打完針就瘟瘟沌沌，因為狀態唔係咁好，對攝影師好挑剔，結果就由朝影到晚，好似拍戲開工，不過影得耐都唔緊要，因為啲朋友讚佢哋相影得好靚。
本文作轉載及備份之用 來源 source: http://hk.on.cc
|
鍾意就快D Share啦！
|
|
|