無綫電視城再爆疫情恐慌，繼月初開始有多位幕後職員初步確診後，「聲夢學員」潘靜文上周於《勁歌》錄影前作快速測試時初步確診，估唔到疫圈已經殺入劇組，有消息指藝員周嘉洛證實初步確診！現正為劇集《回歸》、《曙光》開工嘅周嘉洛，每日都投入拍攝工作，尋日（23日）同樣為《回》開工嘅好友吳偉豪，晒出周嘉洛現身化妝間Set頭嘅片段，見到周嘉洛成個人頭耷耷現病態，冇晒精神，疑似已經出現病徵。加上另一好友「風少」陳浚霆亦為周嘉洛及吳偉豪送上藥水及連花清瘟膠囊，未知係咪見到好友病病哋，所以贈送藥物。
據知無綫現已暫停所有錄影廠景，藝人化妝間、多個錄影廠亦已進行大消毒及清潔，亦叫所有台前幕後工作人員都接受快速檢測，以策安全。
而喺傳出周嘉洛確診消息前，藝人Ronny（黎澤恩）就已經喺社交網爆料，指同劇「有一位藝員確診了」，並指對方本身已經有病徵，佢自己都有同過對方交流，因此佢都急急腳去做檢測。不過當東網向Ronny查詢確診者是誰時，佢就即封口唔講，佢自己就Check咗冇事，而事後佢亦極速Del Post。
至於同劇嘅女主角陳煒亦甫出快速檢測包結果，顯示為冇感染，又留言：「膽戰心驚的一天」，更加落實周嘉洛初步確診消息。東網致電陳煒詢問，佢指周嘉洛係快速測試確診，今日應該會去做正式檢測：「一切都會等佢嘅檢測結果，有需要都會配合再做測試。暫時都Touchwood冇確診，都希望會冇事喇！」而同劇嘅馬貫東尋晚亦做足兩次快速檢測，均顯示未有確診。
周嘉洛同樣有份參與拍攝嘅處境劇《愛．回家之開心速遞》未知係咪繼續開工，見周嘉洛「媽咪」滕麗名晒出自拍照，並留言指「一班《愛回家》嘅演員及台前幕後工作人員喺疫情嘅高峰期，依然無怨無悔日夜工作，呢個時間為嘅當然唔係搵錢……係使命感……請懂得欣賞我們全體員工的努力我們的堅持。」似乎未受周嘉洛確診影響。
本文作轉載及備份之用 來源 source: http://hk.on.cc
|
鍾意就快D Share啦！
|
|
|