谷德昭大讚同ERROR做訪問好Chur好過癮
由導演谷德昭主持的ViuTV節目《爆谷一周》，前晚（2日）就搵咗ERROR做嘉賓，四子繼續發揮搞笑本色，互爆趣事之餘，又被谷導追問他們最Like嘅AV女優，事後有員工爆呢Part剪咗好多，因為內容唔出得街，所以好多網民跪求可唔可以喺網上出一刀不剪嘅原片。
而谷導噚晚喺社交網貼文同合照，大讚同四子訪問好開心，又用唔同嘅跑車形容佢哋，「四位的喜感能量有如四台巨大馬力Engine，我踩一吓油，四部車緊貼推泵把，大家熱身後，就唔分主客，你去一段，佢又Chur一段，五部車一齊飄移入彎，十分過癮！」
讚肥仔沉穩內歛
谷導讚肥仔沉穩內歛，劍鋒不露，「保時捷四門雙渦輪增壓係佢。」至於
193，谷導就話：「雙腿五呎咁長，最適合著條短褲唔著襪，打開林寶堅尼大牛嘅海鷗翼車門，伸出毛茸茸嘅長腿，踏著 Loafer 一步就潚洒跨出車，將匙拋給代客泊車，然後戴上黑超嘴角一牽就行咗去。
（*題外話：真係見過一個成筒山揸餅咁嘅大肚腩短腳中佬爬出架林寶，好肉酸，腳唔夠長一步落唔到車真係唔好揸。）」
期望同ERROR搞啲嘢
「而Dee哥鍾意齊色齊碼買買買，最適合法拉利，架架齊色齊款紅黃黑白，都係嗰句容易襯衫吖嘛。保錡兄勝在夠嘈，嘈得嚟有料所以吹佢唔漲當然亦唔打算吹佢。快吞轟正是馬莎拉蒂的獨有Engine聲，平時斯斯文文，但你焫著我，你唔好彩嘞。」
谷導仲話睇留言今集好多觀眾同屋企人一路食飯一齊睇，好多阿媽睇得好開心，有個仲噴飯𠻹，好感動！所以好希望同ERROR搞啲嘢，目的都係四個大字—娛樂大家。
更多第5波疫情資訊，請到以下專頁瀏覽按此
立即下載 | 全新《星島頭條》APP: https://bit.ly/3yLrgYZ
|
鍾意就快D Share啦！
|
|
|
