2022年7月1日星期五

頭條獨家丨譚詠麟落閘兒子繼承衣鉢出新碟要唱到80歲 #譚詠麟

頭條獨家丨譚詠麟落閘兒子繼承衣鉢出新碟要唱到80歲

「樂壇校長」譚詠麟相隔4年，推出全新專輯《傾．聽》，將自己喜歡嘅8首流行歌曲，重新演繹為廣東歌。71歲嘅阿倫出道超過40年，但對音樂熱誠不變，揚言最快喺80歲後才諗退休問題，他唯一肯定，會好好為26歲兒子譚曉風把關，唔會畀佢繼承衣缽，他認真說：「做藝人壓力太大，好辛苦，𠵱家我最緊要係開心及享受過程。」採訪：方騫平攝影：沈健程化妝：Eva Chuk @ Faces make up studio 髮型：Silkcut salon PERNY tang

譚詠麟出道超過40年，但對音樂熱誠不變。



譚詠麟對唱歌保持熱誠，講新歌講到滔滔不絕。



譚詠麟體會到做藝人壓力太大，好辛苦。

譚詠麟全新專輯《傾．聽》，阿倫重新演繹咗汪峰、克麗絲叮、李健、六哲、江蕙、周杰倫和費玉清嘅作品，他尤其推介《水中傳奇》：「呢首歌係將我嘅《水中花》同李健嘅《傳奇》結合埋一齊，無論音樂結構及唱法上都好一體，效果想唔到咁好，李健仲唔收錢送咗版權畀我。」



全新專輯《傾．聽》，將阿倫喜歡嘅8首流行歌曲，重新演繹為廣東歌。

明年在港開個唱

這張唱片由經理人張國忠策劃，「其實我乜歌都唱過晒國忠就認為『一隻好嘅歌只要去到你嘅手，就變成一隻係你嘅歌。』咁我何樂而不為？而且我冇銷量壓力，反而係攞版權最難。」除咗出新碟，阿倫更打算明年喺香港舉行個唱。



早前阿倫全情投入為新歌《等你不等你》拍MV。



阿倫最後一次香港單飛個唱喺7年前，當時同表演嘉賓郭富城台上又唱又跳。



5年前孖住Sam喺紅館舉行過《Happy Together演唱會》，大受歡迎。

40年前已「上咗岸」

對於面對近年一啲反對聲音及評價，阿倫心態正面，冇諗過為此而退休，「總之唔好理啦，鍾意點樣就點樣，人都過咗咁多年咯，睇到成個社會及世界係咁，與其係改唔到，何不自選一個開心角度，咁每一日都係賺嘅。」他輕鬆笑道：「好多人同我講：『你呢個年紀要享受生活，上岸啦……』上岸？唔係誇張呀，其實我40年前都已上咗岸哈……因為我要求低呀，咁多年嚟我都係鍾意返40年前嘅嘢，着住波鞋踢波吹水、食大排檔、篤魚蛋、食臭豆腐，我又唔係追求大魚大肉，榮華富貴……」阿倫堅持keep住25歲心態，因為承諾過歌迷要唱到80歲後。