獨家丨王浩信為入行同媽咪冷戰一年 余香凝拍《心裏美》憶同爸爸嗌交
余香凝（Jennifer）和王浩信首度合作電影《心裏美》，戲中兩人同樣飾演老師，但卻有天壤之別，亦令他們想到自己讀書日子。電影除了講師生，最重要是談及兩代人關係，原來Jennifer以往曾跟爸爸經常嗌大交，而浩信為入行曾令媽咪唔睬一年，不過他們已為人父母，會提醒自己不要重蹈覆轍。採訪：杜杜
兩人初次合作，Jennifer大讚浩信是個好對手，不論是高度和演戲都一樣夾，「佢優點係高囉！我可以着返有少少踭嘅鞋，之前試過要擘大雙腳拍大頭，同埋佢好畀心機準備，而我如果有啲情緒戲做唔到會愈嚟愈氣餒，會𤷪自己，但佢會喺隔籬用返個角色嘅角度出發問我問題，好似學戲堂啲老師咁，等我入返入個角色，唔好跳咗出嚟嬲自己。」
學識跟女兒溝通
戲中Jennifer跟飾演爸爸的吳岱融關係極差，經常嗌大交，令她想起以往跟爸爸相處，因她爸爸跟吳岱融角色一樣是傳統男人，「佢哋係愛你錫你，但係佢哋唔識得表達，或者講兩句就變咗嗌交，呢啲場口令我諗返以前唔識同爸爸溝通，拍完呢個戲會提醒自己有啲嘢唔可以等，對爸爸媽媽或者愛錫嘅人要多啲關心同問候。」浩信20歲時試過被媽咪唔睬一年，只因反對他入行怕會學壞，「嗰一年我入咗行做緊練習生，佢以為我冇搵工，佢就覺得我好唔聽話，直至我第一首歌《訊號》出街，我叫佢去時代廣場睇首播，佢仲以為我拍廣告，慢慢佢見到我做到一啲成績，有正常啲嘅收入先開始接受。」
已為人父母浩信和Jennifer，他們都會提醒自己要好好跟女兒溝通，浩信更加會採取開放式態度，「點解要將自己價值觀加落佢度，去滿足我想做嘅嘢，唔係佢想做嘅嘢，我哋呢代父母係應該發掘佢想做嘅嘢，然後去幫助佢去享受點樣做，呢個世界不斷變緊，你點可以否定佢揀嘅嘢係唔好。」而自認緊張大師的Jennifer，會不斷提自己學識放鬆，「呢個社會所有人嘅氛圍，會令你覺得唔幫佢做某啲嘢係咪佢會輸，將來會埋怨我，所以會叫老公同媽咪提返我，唔好做啲瘋狂行為，最緊要係小朋友開心。」
星島新聞集團慶回歸25周年專題網站，請即瀏覽
立即下載|全新《星島頭條》APPhttps://bit.ly/3yLrgYZ
.jpg)
.jpg)
|
鍾意就快D Share啦！
|
|
|