獨家丨何晉樂望似張敬軒唱功多元化 新歌用被欺凌經歷鼓勵人
「聲夢」何晉樂（Rock）首次推出個人派台單曲《無證騎士》，以小學時被同學踢落樓梯欺凌經歷做主題，希望歌曲為遇到相同遭遇的人打氣，知道他們並不孤單。未來目標是想成為好似偶像張敬軒一樣的歌手，能夠演繹不同類型歌曲，而早前在頒獎禮跟前輩劉德華同台，對方的專業態度，令他更加不敢怠慢。採訪：杜杜 攝影：沈健程髮型：Hugo Poon@iiAlchemy 場地：Pier 1929
第一次演繹真真正正屬於自己的歌，Rock除了覺得心情興奮外，還多了另一番感覺，「一首出道歌證明你正式成為歌手，好開心第一首我自己作品係講我自己嘅故事，好有歸屬感，係屬於自己嘅感覺。」
難忘跟劉德華同台
《無證騎士》講Rock在7、8歲時讀小學被欺凌的經歷，「嗰時背脊有好大個鞋印，因為畀一個同學仔踢落樓梯，呢件事情引發咗好多嘢，因為我細個好鍾意睇啲英雄片，亦都激發我去讀有關醫學嘅嘢，我想幫人，呢首歌係想講我呢個心情同經歷，同人講一啲唔好嘅事情，你要識得起返身，我會伸隻手去扶你，係首好溫暖嘅勵志歌。」在英國時曾在藥房工作的他，發現人其實並非想像中脆弱，只要有適當陪伴就能捱過，而他認為音樂正是最好的陪伴。
一直有創作的Rock，原來都有想過第一首次由自己作品，「自己都有啲半製成品喺度，但係有我好鍾意嘅監製（周錫漢）去幫我做，想相信咗佢先，因為第一首好容易炒車，梗係穩陣啲好，我個人係比較理性，加上佢都好鍾意我呢個故事，我都想第一首歌畀人認識我多啲。」不過Rock強調會keep住創作，未來更加希望可以做到偶像張敬軒一樣的歌手，「佢啲歌點解可以咁有新鮮感！？我想成為佢咁多元化嘅歌手。」講到最近有機會在《香港金曲頒奬禮》跟前輩劉德華同台演出，對方努力又親切的態度，亦鞭策他要更加進步，「綵排時見到佢，望住我哋已經電到我哋，佢身形keep得好好，又同我哋打招呼，又nice，基本上冇聽過佢嘅負評，如果想成為藝人佢係一個好好嘅榜樣。」
立即下載|全新《星島頭條》APPhttps://bit.ly/3yLrgYZ
|
鍾意就快D Share啦！
|
|
|
