獨家丨鍾雨璇選「口罩小姐」表演靠七仙羽教路 唔考慮用返舊名蘇慧恩
ViuTV綜藝節目《尾二一屆口罩小姐選舉》日前已經選出20強。是次比賽有不少熟悉的面孔參加，早前於50強止步的鍾雨璇（前名：蘇慧恩）面試時，以手、腳及口表演寫書法令人印象深刻，身為七仙羽（七師傅）徒弟的她與另一選手齊釨湮的表演，原來都是由七師傅教路。鍾雨璇接受《星島頭條》訪問，非常感謝七師傅幫助，又稱開心可以在節目中表現更真的一面，「度咗啲得意啲嘅橋喺節目中表演，其實我之前都諗過用唔用Miss look見人、着唔着黑絲，到底要唔要去到咁盡，咁師傅話我參加得呢個比賽，佢哋要令人開心，就要做啲特別啲嘅嘢，最後我同齊釨湮都有接受師傅的建議。」
以更真一面見觀眾
鍾雨璇指身邊友人其實都知她是個有搞怪一面的人，只是平時較少在幕前表現出來，這次放開自己獲好評，她也很高興：「可以做返個放啲嘅形象，我都好舒服。」更分享其實個表演準備得好辛苦，「我通宵喺屋企練，我諗練咗幾百次，我練到半夜三更，我阿爸阿媽都走出嚟關心，因為我練飛鞋嗰段，高踭鞋跌落地又好嘈，幾鬼驚畀樓下投訴，同埋要用腳趾夾住枝毛筆同用口擔住枝毛筆都好難。」她更因此體會到殘障人士不能用手拿筆畫畫或寫字的痛苦。
暫不用回舊名「蘇慧恩」
對於出場時戴着口罩，都有網民認得她是鍾雨璇，她都感到很開心。至於有網民認為她的舊名「蘇慧恩」其實已經不少人識，覺得她可以用回舊名似乎較好。鍾雨璇表示暫不考慮用回舊名，「其實我改咗名之後，好多人都叫我改返做『蘇慧恩』，但我改咗做『鍾雨璇』之後真係多咗好多新發展，同埋啲嘢又好似順利咗，我就唔會改返做『蘇慧恩』住。」更表示或者將來不再做演藝圈才考慮用回舊名。
鍾雨璇於節目中以歌手身份自我介紹，更坦言知道自己知名度不高，「我本身係唱歌嘅，因為都唱咗十幾年都冇乜人知我係邊個，如果再唱歌我覺得唔係咁特別囉！」而她接受本報訪問時亦表示做歌手的確感到少許氣餒，「雖然有啲灰，但一定唔會放棄唱歌，因為本身真係好鍾意唱歌，辛苦都會繼續做。」
另類方式選美
鍾雨璇入行逾10年，擁澳洲昆士蘭大學工商管理系學士及愛爾蘭國立都柏林大學學院市場學學士學歷的她，2010年參加過香港小姐，但20強止步，翌年再參加工展小姐終於奪得冠軍，到2016年她再參加「大閘蟹小姐競選」以大熱姿態當選。這次參加「口罩小姐」，她也覺得與傳統選美形式很不同，「以前啲選美一定要好斯文、好大方、講嘢要陰聲細氣，但今次戴口罩出嚟，要好特別，可以做返癲癲喪喪的自己。」更希望這次參加「口罩小姐」可以成功轉型。
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|
