口罩小姐起底丨鍾慧冰愛女林靜莉簽開電視照亮相ViuTV 鍾雨璇自嘲唱歌10年冇人識
去年ViuTV因應疫情人人都要戴口罩，舉辦了《最後一屆口罩小姐選舉》成功製造話題，豈料一年又過去，大家仍然要戴口罩，於是又再找來ERROR，夥拍去年參加過《最後一屆口罩小姐選舉》的米露迪、鄭伊琪主持《尾二一屆口罩小姐選舉》。節目日前播出，有網民發現今屆參賽者有不少熟識的面孔，即使戴上口罩都認得出是誰。其中鍾慧冰愛女林靜莉（Jeannie）雖然出鏡時間非常短，但與程人富的短劇令網民頗深刻，以傳染病為由避開程人富的「魔爪」，連阿Dee（何啟華）都大讚有演戲天份，最後順利入圍。
真人騷常客林靜莉 26歲
其實Jeannie早前才與香港開電視簽約成為旗下女藝員，一星期有幾晚都見到她主持《一線搜查》，但據知她現身ViuTV節目不會有衝突，沒有被合約箍死，就有更多曝光機會。其實Jeannie非首次於ViuTV真人騷中亮相，去年就曾參加相親真人騷《阿女又戀嚟》，阿媽鍾慧冰更幫Jeannie揀男友，又睇住阿女「拍拖」。節目出街後，Jeannie多咗人識，阿媽鍾慧冰爽直的性格亦很有話題性，與媚姨、保錡一同拍檔主持《MM730》。
而Jeannie畢業於香港樹仁大學新聞系，之前曾任科技網媒主持，童年曾學習芭蕾舞的她，一直積極爭取幕前演出機會，除了繼續做擅長的主持工作，亦有參加香港電台的多媒體節目《新時代奮鬥者》作密集式演藝培訓，另外又經營YouTube頻道拍片，可見對自己的演藝路非常有企圖心和恆心。
高學歷歌手鍾雨璇 36歲
歌手鍾雨璇（前名蘇慧恩）面試時表演用手、腳及口寫書法，她在台上亦以歌手身份自我介紹，不過就不考慮用歌聲吸引評判，「我本身係唱歌嘅，因為都唱咗十幾年都冇乜人知我係邊個，如果再唱歌我覺得唔係咁特別囉！」於是她選擇以另類方式寫書法，睇到ERROR的肥仔（梁業）都拍晒手，直指表演令他很驚喜，認為她的反差人設非常好，而且揀啱表演方式，最後更以三個圓圈順利入圍。
其實鍾雨璇入行逾10年，擁澳洲昆士蘭大學工商管理系學士及愛爾蘭國立都柏林大學學院市場學學士學歷的她，09年曾參加TVB的《超級巨聲》，可惜未能入圍。兩年後又參加香港小姐，但20強止步，翌年再參加工展小姐終於奪得冠軍，但星途似乎未有因此更順利。2013年嫁給律師男友周紹榮，以為她會淡出，但仍積極發展事業，而婚姻則維持一年就結束。到2016年她再參加「大閘蟹小姐競選」，受到網民熱烈討論，她更以大熱姿態當選。今次參加「口罩小姐」表現出具反差一面，看來有意轉型行綜藝路線入屋，未知她會否如上屆「口罩小姐」，於賽後加入ViuTV呢？
海產大王孫女蔡頌思 28歲
於節目中被193（郭嘉駿）及強尼等人批評官腔又做作的蔡頌思（Jocelyn），面試時扮比卡超都被網民笑隔住個Mon都覺得尷尬，最後以眼淚攻勢講心聲成功入圍，原因是評判覺得要給她一個機會展示更真的自己。
但似乎不論Jocelyn多用力展現自己，網民對她最有印象的仍然是她的家底。事關她是「海產大王」蔡繼有的孫女、新華集團主席蔡冠深的女兒，被稱為「40億千金」的她入行做明星，給人感覺似玩玩吓。但其實她為成為一名演員都不斷進修自己，於中大英文系畢業後，就到北京電影學院進修，更曾考入演藝學院，但後來因為要拍電影沒有繼續就讀。
2019年她成功在電影中得到一個角色，於《家和萬事驚》飾演吳鎮宇及袁詠儀的女兒，但演員路走得並不順利，之後就參與2020年香港小姐，被譽為「近年最高質佳麗」的她是賽前大熱，成功走到最後好可能可以加入TVB去拍劇，不過她後來中途退賽。今次參加《尾二一屆口罩小姐選舉》起步似乎欠些觀眾緣，未知她有否受打擊。
撰文：Phoebe
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|
