2022年9月5日星期一

獨家丨張偉文嬲爆反駁:碗飯好寶貴點解唔放過我聲大大女歌手指坐輪椅唱歌「慘不忍睹」 #張偉文

獨家丨張偉文嬲爆反駁:碗飯好寶貴點解唔放過我聲大大女歌手指坐輪椅唱歌「慘不忍睹」

69歲「靚聲王」張偉文（Donald）今年2月確診新冠肺炎，康復後重上舞台，愈戰愈勇。日前，Donald喺元朗大會堂補場演出，亦係《友情有義演唱會》最後一場，繼續用淚水答謝歌迷嘅厚愛。對於Donald坐住輪椅開Show，反應兩極，有位好有「份量」又聲大大嘅女歌星形容係「慘不忍睹」，Donald激動反駁：「碗飯對我嚟講好寶貴。」採訪：娛樂組

張偉文回應坐輪椅唱歌好慘論，講到咬牙切齒真係好嬲喎。



要經理人方俊及好友姚煒呵返。



新冠肺炎康復期間張偉文長期「與世隔絕」導致失智症變得嚴重，試過喺老人院撼頭埋牆，5月初做網上演唱會時多次扭計發脾氣。直至有得喺7月及8月尾，補埋最後兩場《友情有義演唱會》，Donald才回復精靈狀態，愈唱愈強。Donald唱完最後一場元朗show後強調冇失落感：「大功告成反而開心，除非好耐冇得唱先會迷失方向。」經理人方俊承諾為他爭取演出：「只要有唱到嘅能力，有朋友支持佢，都會安排佢演出，不過如果再上紅館，都唔容易攞到期。」



姚煒為張偉文個唱復出舞台，張偉文坐在經改裝的流動椅子在台上唱歌。



每場演繹《每當變幻時》，Donald都用淚水去答謝忠粉厚愛。



元朗大會堂係《友情有義演唱會》嘅最後一場，坐無虛席。



張偉文完騷後坐輪椅去謝票。



黑妹姐及肥媽嚟過後台探班。



Donald一直冇諗過可以唱到咁多場，好開心達成心願。

坐住唱下身唔郁得

5年前張偉文受腰椎毛病困擾不良於行，要長住老人院，但仍自強不息唱歌搵食，唔要做廢人，但對於他坐住輪椅都唱，亦有反對聲音，甚至有位好有「份量」講嘢大大聲嘅女歌星，形容係件好可憐嘅事。Donald對「慘不忍睹」嘅評語有啲耿耿於懷，帶點不悅回應：「唔得咩？好多人坐住都冇得唱，最少我有呢個能力，其實坐喺度唱唔容易，下身啫啫(指重要部位)唔可以郁，否則冇氣。」在旁嘅方麗盈即為Donald解畫，估計他所指，係要hold住丹田氣。



環星娛樂老闆張國林(右二)答應繼續為張偉文開騷，方俊(左三)、方麗盈(左二)、姚煒(左一)都替張偉文開心。



冇能力去談黃昏戀

變得好sharp醒嘅Donald續說：「無論我用咩方法唱落去我都係唱歌啫，如果欣賞我，請唔好加啲可憐目光去睇我，然後說三道四，我都係為搵食啫。」Donald愈講愈激動，甚至咬牙切齒對住鏡頭說：「我梗係嬲啦，我剩番碗飯，碗飯對我嚟講好寶貴，彈人做乜啫？得一、兩份收入都唔放過我？我點樣做係我嘅事，我鍾意唱歌，鍾意唱到老呀！」方俊見他咁火即呵返：「可能啲人未必了解啫，唔太清楚唱歌係佢精神支柱，所以如果佢狀態唱得到，我都會繼續安排佢唱，其實好多fans好錫佢，睇show之餘仲會送上平安利是，但佢身體要爭氣。」姚煒就鼓勵張偉文多做運動，扶住企吓起身，唔好咁懶。