楊明今日（7日）出獄，即直接往電視城，還拍攝片段向外界公開道歉，樣子憔悴的他，全程表現歉意，期間更2次鞠躬表達悔意，不過，因他擔心自己講得不好，遂拿出「貓紙」輔助，道出自己的想法。
全文如下：
大家好，我啱啱喺入面出番嚟喇，喺呢十幾日入面，我諗咗好多嘢，反省咗好多嘢，有啲嘢好想好認真咁同大家講。我驚我自己講得唔好，又或者有啲講遇漏，所以我記低咗。
對於我飲酒嘅習慣，為大家同公司帶嚟好多麻煩同擔憂，我深感抱歉。我喺度向大家；同一直關心我嘅家人、朋友同公司，喺度好認真咁同大家講聲對唔住。我好明白所製造出來的行為係完全唔可接受；受到今次嘅懲罰係必然的，喺裏面呢十幾日我不斷反省，我知道遵守法紀；遵守道路交通規則係非常之重要，我每日都提醒自己，之後一定要謹慎做人，認真工作，做番多啲嘢回饋社會，我不會容許自己再有做出同類嘅事情。
呢件事的確係我人生中好大教訓，希望大家畀多啲空間、畀多啲時間同機會我，等我可以重新出發。最後希望大家再次接受我道歉。 對唔住。
說畢感受後，楊明再次起身鞠躬，短片亦就此完結。而其女友莊思明的座駕在下午2時許駛離電視城，楊明、思明和經理人都在車上，可是司機由將軍澳出香港東隧時行錯行車線，去了九龍方向，最後要在油塘駛出，之後再返回東隧，並於下午2時42分返回莊思明位於半山的寓所。
楊明拍完悔過短片之後，再接受無綫娛樂新聞台訪問，詳述18日獄中生活同心理狀況， 他指頭3日因去到一個好陌生以及狹窄的地方，令他非常恐懼，加上自責，很多事不停在腦海浮現，要過了幾日之後，才能定下來思考，他覺得這18日對他來說是一個很重要的時間、轉捩點，令他要好好成長。
他指在獄中，令他最自責的是愧對家人、父母：「咁大個人仲做一啲事，令到我身邊嘅人、屋企人極度擔心，爹哋媽咪咁老都仲要擔心我...」說到此處，已滿眼通紅的楊明，忍不住哽咽起來：「呢個係我喺入面最自責嘅嘢。」由於去到一個陌生的地方，很多事都沒有接觸過，令楊明非常恐懼，主持問他是否在獄中喊了很多次？他謂：「係，因為好多不明朗嘅事情會發生，係一個非常陌生嘅驗，恐懼每小時都纏擾住我，唔知會有乜嘢程序，同埋出面嘅輿論，我喺入面係唔知，好多時都會被無限放大，不斷咁攻擊，所以真係好恐懼。（父母同思明係咪都幫你去克服恐懼，無怪過你?）係，我喺入面自己一個承受空虛、寂寞同自責，思明就要面對輿論同記者，幫我面對我要處理嘅嘢，好辛苦咁處理，父母就要承受一啲唔好嘅批評，呢個係我喺入面自責份量最重嘅事，想喺度多謝佢哋，思明同爹哋媽咪。」
楊明透露他在獄中沒有接觸人，靠書信與思明溝通：「佢會寫信，同埋有探訪機會，每次都好珍惜個半小時，佢哋知道我喺入面好驚、好空虛，佢哋都冇講啲乜嘢畀我聽，只係畀支持，同親切嘅笑容，但我其實見到佢哋嘅擔心，但佢地極力咁樣表達畀我聽叫我唔使驚，呢啲我全部感受到。」
他指在獄中思考人生，亦有想之後的工作，雖然有好多事都會擔憂，慶幸公司送暖，對他鼓勵很大：「好多謝公司，我入去第二日，思明同我講公司對我嘅關心同支持，同埋所有嘅資源，我喺入面好多嘢諗，會有好多攻擊，而呢個（公司送上問候）係一個好大嘅鼓勵同鼓舞，衷心多謝公司！」在訪問中段已不停索鼻的楊明，說到公司的關顧，再度忍不住喊，續指：「由細到大，我做錯咁多嘢，公司都對我不離不棄，呢間係我由細到大嘅公司，多謝！」
他表示在獄中頭幾日情緒波動，之後慢慢冷靜下來，由於時間多，可以好好沉殿自己兼反省：「經過一輪恐懼同唔習慣，同自己講唔可以再咁落去，因為唔會有手機，亦冇接觸人，時間好多，一早起身就望住道牆，屋企人攞咗啲小說、人生哲理書以及聖經畀我，靠呢啲書度過艱難時間，睇書同聖經，時間真係會過得快咗，同埋吸收書入面嘅哲理，會令自己諗嘢可以更專心，頭幾日當然得唔好，但之後，雖然唔係瞓得超級舒服，但都舒服咗。」
除了公司送上問候，楊明指獄中的職員都有送上簡單安慰：「好多謝入面嘅職員，每日送餐都會送鼓勵。（講乜嘢?）都係叫我加油，唔好灰心，十幾日好快過，雖然好簡短，但好窩心。」楊明直言經歷過這段日子，明白同人溝通好重要：「一日廿四小時無人傾偈，係好辛苦，但都係一個沉殿自己、成長的機會，好好回望下30至41歲嘅嘢。」至於之前有指他因人身安全問題要求轉倉，他則否認：「我冇要求，因為我入到去荔枝角收押中心，係需要喺醫療室入面作五日隔離，以免我有機會帶咗病毒入去，所以嗰5日係冇接觸任何人，一日只見一次醫生，完咗之後，因為嗰度都多人確診，所以先轉咗去赤柱監獄， 呢個係正常做法，喺入面唔會觸到人，所以唔會有人生安全問題，完全唔驚。」
終於告別鐵窗生涯，之後會有甚麼目標？他謂：「呢10幾年雖然每星期都有返屋企食飯，但都冇乜機會去真正關心佢哋，所以希望之後多啲時間陪佢哋，至於工作就睇公司安排，自己嘅生意都會停一停先，因為呢10幾日，睇得好少報紙，唔知而家發生緊乜嘢事，只知明天（8日）通關，好多嘢之後再慢慢計劃。（抖下先?）係，抖一抖，再重新去計劃下，回饋社會，做嘢稍後一步先再諗。（係咪好想返屋企見父母？）佢哋前日中招，而家係竹篙灣隔離緊，我頭先打畀佢哋，依家已經一線，仲有少少喉嚨痛，應該呢幾日會出嚟，我會去接佢哋，之後一家人食飯。今朝啱啱出嚟，依家我都想返去，感受一下屋企，同埋想同思明傾吓偈，想食一碗熱麵。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|