星8卦｜串嘴「四家姐」得罪全行後台冧檔靠黏老闆嫂 得罪老闆等收皮
成日都話做人唔好有風駛盡𢃇，尤其一啲以為自己埋到好碼頭就巴巴閉嘅短視小三。
「四家姐」想當日靠鄉土味跟住「偽老細」串過碼頭咕哩，由Reception到監製都統統得罪晒，以為自己係新歡，萬千寵愛任何人都要遷就，明明啲演技爛到一個點，但依然成日做主角。
有名你叫「偽老細」，唔駛幾耐金主失勢，連大權都無埋，「四家姐」平時周圍惹火頭，無咗靠山大家仲唔一沉百踩，賤過地底泥。好彩佢平時最叻擦鞋，一直湊住「老闆嫂」，兩個人恐龍時期合作過做兩姊妹，話晒「老闆嫂」係一姐，多年嚟就算洗盡鉛華，「四家姐」都無放棄定期送上門打招呼，目標梗係佢背後嘅「老闆」老公。
公仔箱無運行，佢即刻捉實「老闆嫂」隻腳，希望「老闆」畀啲工作機會，終於枕頭狀有效，「老闆」天皇預埋「四家姐」一份。可惜佢死性不改，都未開工，就周圍放料，激到「老闆」生蝦咁跳。但「老闆」無佢符，係因為「四家姐」對無利用價值嘅人天生一對狗眼，但如果有機會幫自己上位嘅，連身邊嘅助手甚至工人都低聲下氣扮好人，又或者扮淒涼博同情。不過今次又再亂放料，已經俾「老闆」炳咗一鑊，叫佢收聲，否則下一步就收皮！
【相關文章】：
星8卦｜「孝哥」縱容爛賭老婆輸身家 妻債夫還捱到病
星8卦｜太太羅美薇神隱廿年 揭張學友狂推job之謎
星8卦｜模範夫妻爆離婚！小雲出軌發姣派帽 吉仔用成副身家箍煲
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
本文作轉載及備份之用 來源 source: http://hd.stheadline.com
|
鍾意就快D Share啦！
|
|
|