2023年2月14日星期二

獨家丨王賢誌公開囝囝寫真第一波甜舔雪糕《仔仔一堂》情侶煮情人節餐玩互餵 #仔仔一堂 #寫真 #王賢誌

獨家丨王賢誌公開囝囝寫真第一波甜舔雪糕《仔仔一堂》情侶煮情人節餐玩互餵

由王賢誌(Vinci)監製及主持的同志配對真人騷節目《仔仔一堂》，成功撮合Ray及Kenny成為情侶，省靚Vinci嘅金漆招牌。於情人節兼每月14號的拍拖紀念日，Kenny為Ray煮情人節餐外，兩人更送花向Vinci謝媒，同時開心share慈善寫真集《Pride in Action》。相中兩人唔避忌互咀及貼面食雪糕，勇敢去愛的Ray堅定說：「發自內心嘅熱戀期行為，希望世界多一點愛少一點恨，唔好歧視同志。」採訪：方騫平攝影：譚志光化妝髮型：Claudia 場地： Bosses studio

Kenny(中)為Ray(右)煮情人節餐，並送上花束畀Vinci(左)謝媒。



Kenny為Ray開心share慈善寫真集《Pride in Action》。



《Pride in Action》寫真集為5個支援LGBT慈善機構籌款。

雖然節目經已播完，但12位囝囝仍受關注，王賢誌因此自組製作公司兼做埋囝囝經理人，頭炮product打鐵趁熱推出《Pride in Action》慈善寫真集，仲會炒熱餘溫，每周一晚於YouTube Channel做《Boyscation Talk》，Vinci率囝囝講心事及跟member互動交流。



作為經理人嘅Vinci之前請囝囝食開年飯，同時為Carson(前中)慶生。



《Pride in Action》共164頁，售價$428，扣除成本捐贈與《仔仔一堂》節目中訪問過的五間本地支援LGBT嘅慈善機構。



52歲Vinci跟Kevin於2016年8月在溫哥華註冊結婚，成為香港首對同性婚姻藝人。



《Boyscation Talk》之前就請嚟HoHo(右1起)、Nathan、Howard講性反應。

互餵放閃食情人節餐

下月才拍拖一年的Ray及Kenny共渡首個情人節，由於情人節是私房菜館黃金時期，Kenny提前為Ray煮情人餐「開水白菜」及「靈魂雙弄」(蜆)，單係白菜湯底經已落足心機用雞、鴨、火腿熬足5粒鐘，Ray未食已讚不絕口，對住Kenny心心眼說：「佢煮乜都好食，就算冇菜譜都識煮…」當Ray要求Kenny餵飼時，Kenny即投訴：「我煮咗仲要我餵你！」Ray輕聲呵返：「你係咪(白菜)落咗好多糖，咁甜嘅。」Vinci大爆當日Kenny因為一壺愛心湯水而跟Ray撻著。Kenny解釋，拍節目期間Ray喺群組中提出想飲老火湯，他因為技癢煲咗羊肚菌螺頭烏雞湯畀大家飲，點知被Ray私吞…不過，講到底兩人都要謝媒，故先送上代表住勇敢的向日葵畀Vinci，到結婚時一定封媒人利是。



Kenny餵Ray食蜆，Ray未食已讚不絕口。



Kenny及Ray影相時齊擺出心心相印Pose。



兩人互望唔使食都飽。



Sweet呀。



節目後已拍拖接近一年了。



Kenny提前為Ray煮好味情人餐「開水白菜」及「靈魂雙弄」(蜆)。



船P上Kenny(右)送上老火湯，Ray左)私吞定情。

許愛的承諾不會放棄

Ray及Kenny目標3年後結婚，婚後可能領養或收契仔，現階段共同目標係努力賺錢，然後過同居生活。兩人在鏡頭前大擺心心Pose，32歲的Ray仲向Kenny許下愛的承諾：「去到我呢啲歲數適應咗唔想轉變，而且相處過程好舒服，如無意外係佢，佢唔放棄我，我都唔會放棄佢。不過，Kenny愈嚟愈靚仔，我都擔心有一日俾人搶咗，有段時間亂諗嘢，情緒有好大困擾，直至有日佢安撫叫我唔好諗得太多先定啲嚟。」Kenny乘機指Ray為人固執唔聽人講，所以有時會發他脾氣。



社交網相見兩人不停放閃。



兩人出街拍拖同異性冇乜分別。



閃盲眼球。



節目中兩人喺沙灘談心後，加強咗了解及溝通。



情人節成雙成對。

寄語member做好自己

提到寫真集中兩人著住情侶裝又攬又嘴行為大膽，Vinci踢爆說：「佢哋私下仲大膽啦…其實好多fans都鍾意睇佢哋好sweet嘅場面㗎。」Ray甜笑默認：「每個月嘅14號我哋都會去酒店staycation慶祝拍拖紀念日子，喺酒店房入面唔止攬錫咁簡單呀？」Ray認為熱戀中情侶唔使要求都會錫埋去，強調冇壓力：「節目《仔仔一堂》帶出勇敢去愛訊息，亦慶幸Vinci塑造到我哋呢班『優質股』，出到街冇被鄙視，啲人對我哋好nice，我哋都係普通人。」Kenny認為無需要理人。至於Vinci成功做媒人有滿足感，叮囑兩人要keep住甜蜜保住他金漆招牌：「身為同性戀者唔需要理會人哋嘅奇異眼光，只要做好自己，做出一啲成績自然得到人哋欣賞。」