藝人張致恒與老婆區燕雯（雯雯）多次鬧婚變，早前因張致恒債主臨門，受到牽連嘅雯雯嬲爆發長文，指與老公劃清界線，仲講明冇錢還，就算老公出軌都唔會對佢生活造成影響。佢今日（13日）喺社交網同網民玩快問快答，有唔少網友同佢打氣，佢透露依家冇請工人姐姐，親自湊3個兒子感到有啲攰，不過佢話張致恒都有幫手照顧小朋友，有網民讚大仔天寶靚仔適合做童星，佢就造話：「有人搵佢，可以試吓。」而講明冇錢嘅佢亦表示即將會返新工搵錢養家。
至於佢同張致恒嘅夫妻關係，睇嚟就未有好轉，佢話：「其實都冇話有冇好唔好，大家每日角色都係爸爸媽媽，好多嘢唔係單方面，需要睇吓有冇心改變。」有網民提到張致恒曾自爆患「性上癮」，問雯雯對方性能力時，佢大方咁話：「你對佢咁有興趣，你應該係佢去社交網！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
