無綫歌唱真人騷《中年好聲音》決賽，於本周日（廿三日）在電視城舉行，周吉佩（吉吉）驚喜勇奪冠軍；賽前大熱的李佳屈居亞軍；季軍就由「黑馬」羅啟豪奪得；至於另一大熱龍婷，則倒灶僅得第四名，但也贏得「觀眾最愛好聲音」。
現年三十六歲的吉吉，過去十幾年，一直未有放棄再做歌手的心願，為了追夢，去年更瞞着太太黃彥欣（Louise）參加比賽；而太太還要從第三者口中才知道，兩公婆亦因此鬧大交，險些釀成婚變！難怪，吉吉攞完冠軍的第二天，繼續勤力返工，「因為我都要養妻活兒o架嘛！」
吉吉一家四口現時住在九龍灣五百呎的單位，稍後會搬到將軍澳較大面積的單位。
吉吉十五年前推出的唱片，當時反應麻麻，但隨着他參加比賽，人氣急升，現時炒至九十八元。
吉吉唱歌了得之餘，還勤力健身，保持最佳狀態，實至名歸。
雖然是決賽，但吉吉也有鬼馬的一面，在鏡頭後伸脷扮鬼臉。
爭一口氣
歷時半年的歌唱真人騷《中年好聲音》，本周日舉行登峰之戰，經過第一回合比賽後，一直被指是「黑馬」的羅啟豪以193分奪得季軍，李佳和周吉佩（吉吉）就分別以195分、196分殺入終極兩強。至於，大熱門龍婷則倒灶，只奪得「觀眾最愛好聲音」。在第二回合，李佳以〈Greatest Love of All〉對戰周吉佩的〈愛很簡單〉，最終吉吉以115分力壓李佳的111分贏得冠軍，更獲得一支價值三十五萬元的「鑲鑽無線咪」。
勇奪冠軍後，吉吉表示從來沒想過自己得獎，現在鬆了一口氣：「我覺得仲係好似發緊夢！我覺得今日自己個狀態發揮比平時好少少，應該有嘅水準都發揮到出來，所以今日對自己表現都滿意！心情就⋯⋯o依家終於鬆一口氣！其實今日心情唔太緊張，比起之前嘅比賽，因為今日抱住表演嘅心態。由報名參賽都係諗住試吓，又曾經被（龍婷）淘汰過，我諗住輸梗，一路玩落去，自己浮浮沉沉，完全冇諗過今日可以攞到獎，我覺得好開心！」
問到有否覺得吐氣揚眉？他說：「我反而覺得同自己有個交代，十幾年來，自己一直堅持，真係好難，因為當年入行做歌手，到出番嚟打份工，自己有少少放唔低個身段，之後一路工作到o依家，再重新追夢，呢十幾年更加完整咗我，覺得好似爭了一口氣！希望可以證明畀人睇，你嘅堅持係值得嘅！」此外，他直言有機會會向幕前發展：「我都好鍾意唱歌，亦都好鍾意做幕前任何工作，做主持、拍劇等等。（明天要返工嗎？）梗要返工因為我都要養妻活兒o架嘛！我會盡量做好手頭上嘅工作，有歌唱就唱，有主持做就做主持，做好每一日。」
當選後翌日，吉吉如常準時上班，獲得不少同事道賀，他坦言︰「雖然瞓得兩個鐘，但至今仍好興奮！」
在新媒體部門工作的吉吉，枱面整齊，最吸睛的是他一家四口的合照，放在正中間。
中午放飯，吉吉如常跟同事一起到canteen開餐，同事一見他即直竪拇指大讚。
友善的吉吉，跟同事們談笑風生，分享之前一晚比賽的點滴。
吉吉的太太黃彥欣，樣子標緻，在○七年曾經參選港姐，可惜未有獲得名次。
|
鍾意就快D Share啦！
|
|
|