「Selfie變咗社會責任」
近年在街上見到周潤發發哥，大家第一個反應就是走埋去Selfie，連當事人都覺得已變成一種社會責任。「香港人覺得周潤發鍾意同人Selfie，見到發哥唔同自己Selfie好似冇乜面，變咗我好似有個社會責任。」唯一謝絕Selfie時間是跑緊步︰「我跑步計緊時，大家都明白嘅，會話︰『下次先吖！』」
這種貼地，這種親民，發哥覺得是源於由70年代電視台拍電視劇開始，到睇自己的電影，周潤發已經唔似一個明星。「會當係自己屋企人，都係好事。做演員都要從小市民身上吸收他們的人氣，因為將來會演到一些普通人角色，有了這種自然力量，吸收後就有機會演出來，好多時都是我偷他們的東西。」
專登揀5點幾去街市
除了跑山，最常撞到發哥的地方就是九龍城街市，而訪問中發哥更講出一個最大機會相遇的黃金時間。「我去九龍城街市買菜，會著對拖鞋好似街坊一樣，有時仲專登揀5點幾檔口開飯時去，我知道佢哋會用最好嘅食材煮嚟食，我就坐埋去一齊食，返到屋企仲慳番餐唔使食。」
「喺呢度終老不知幾好」
近年香港一股移民潮，不少人都選擇去到新天地定居，發哥到過不少地方工作，但說到底都是鍾情香港。周潤發︰「我唔鍾意坐飛機，唔去得遠，好多人遺忘了香港有好靚嘅景色，一放假就去第二度，飛東京次數好多，甚至買埋樓。佢哋唔嚮往新界的景色，但我好嚮往，我是南丫島長大，對於本土風情非常眷戀，唔想去第二度，喺呢度終老不知幾好。」
南丫島長大，香港是自己的屬地，要發哥推介香港最美的景色，他介紹大家行上麥理浩徑一二段睇下︰「你跑到上山，見到一邊大城市一邊大自然，靚到不得了，真係開心到不得了，香港景色太靚。」不過香港仲有一樣嘢令發哥不捨得走︰「廣東話是有種親切感，時下好多細路幼稚園開始就讀英文，唔識講廣東話，我覺得有點遺憾。廣東話好有韻味，好刁鑽好寸嘴。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|