曼聯決定唔會買斷。(Getty Images)
今夏曼聯壓哨簽入嘅蘇夫恩岩拉伯特，加盟後表現貨不對辦，有消息指曼聯已決定唔會啟動買斷條款，借用期滿就會將佢送返費倫天拿，另再物色中場。
《鏡報》報道，27歲嘅蘇夫恩岩拉伯特今夏以先借後買方式，由費倫天拿轉投曼聯，借用費1,000萬歐元，下季再以2,500萬歐元買斷，不過呢位摩洛哥國腳加盟至今，為曼聯上陣17場，踢過防中及左閘等位置，交出0入球0助攻數據，表現未見突出，坦哈格已決定，借用期滿將會送返費倫天拿。
蘇夫恩岩拉伯特喺卡塔爾世盃聲名大噪，佢嘅搶回球權能力極強，係非洲球員之冠，被譽為「非洲加度素」，不過佢一直有背部痠痛問題，剛加盟曼聯就有背痛情況，嚴重影響表現。
由於現有防中唔啱使，曼聯又要再搵防中，睇中愛華頓21歲小將班夫韋迪，《inews》報道，愛華頓向曼聯獅子開大口，唔會接受低於1億鎊報價，曼聯可能會轉斟該隊另一中場球員阿馬度奧拿拿。
本文作轉載及備份之用 來源 source: http://hk.on.cc
|
鍾意就快D Share啦！
|
|
|