歌手吳浩康（Deep）自上年11月離開效力20年嘅英皇娛樂之後，為咗養妻活兒，去到地盤打工，更因此成為地盤KOL，不時都會喺社交網分享佢嘅工作日常，吸引大批網民關注。繼之前拍片紀錄「地盤飯」惹熱議，昨日（6日）佢又喺社交網分享「地盤下午茶」帶大家睇吓佢下午茶時間嘅情況，並留言：「嚟啦喂！地盤下午茶到底有咩食？今次我準備咗自己食過嘅下午茶同大家一齊分享！開餐」片中佢晒出當日嘅下午茶美食，見到有菠蘿包、三文治及飲品之餘，佢亦自備唔少零食，仲買埋快餐店外賣同工友一齊分享，食得相當豐富！
佢穿制服及頭戴粉紅色安全帽去拎外賣時，突然講：「一齊查出邊個偷我頂帽！」之後就冇再解釋落去。有網民喺留言區大讚佢嘅粉紅色安全帽好靚，佢則回應「升職」。點知，今日（7日）佢再上載咗一段囝囝嘅短片，喺片中寫上：「畀我知道邊個偷我頭盔，下場會同個公仔一樣，撑撑幫爸爸罰佢。」只見片中「撑撑」吳尚恩拎住錘仔不斷敲打面前嘅不倒翁，睇嚟係佢原本黃色嘅安全帽被人偷走咗，藉此發洩。
本文作轉載及備份之用 來源 source: http://hk.on.cc
|
鍾意就快D Share啦！
|
|
|