鳴謝︰ 髮型：Kristy Cheng （林嘉欣）、Ricky Kwok（謝霆鋒） 化妝︰Shuen Kong（林嘉欣） 造型︰Queenie Yu（謝霆鋒） 服飾：Bottega Veneta（林嘉欣）、Valentino（謝霆鋒）
要霆鋒細心數數二人幾多年前拍《戀愛行星》，他都嚇一跳。「感覺都幾黐綫，咁樣就20幾年，不過好開心，見到大家堅持一樣嘢咁耐，而家同下一代講我哋在同一行做咗20多年，佢哋都已經好難理解。」
今次霆鋒多了一個幕後身份，在嘉欣眼中，就是成熟不少。「佢真係為每一位演員度身訂造動作，佢好明白動作嘅需求，又好明白演員在沒太多機會接觸動作下，自己便親自示範一次，又或者詳細拆解你知，我覺得佢好明白演員的心理狀態。」
雖然嘉欣都獲霆鋒贈了幾場動作戲，但坦言都自己都非常仁慈。「不過都撞瘀咗，我話入佢數。」霆鋒︰「佢拍完兩日先同我講︰『我撞瘀咗！』我反問當時嗰take冇事喎，佢答︰『總之瘀咗。』」似搞氣氛多過真投訴。
學友「震喉嚨」以外的最大動作
至於張學友，平時最大的動作就是「震喉嚨」，今次要下下大跳大躍，其中仲要跟霆鋒手執雙棍對打。「大家應該都冇見過學友手執兵器，係幾有趣嘅設計。不過拍攝時都擔心，因為棍打棍好易打親手指，手指冇得練硬淨啲，打到就真係會斷。所以我設計短棍畀佢用，因為知佢有打開網球，理論上耍起短棍來會比較接近。而他亦非常靈敏，動作組話佢係『印影機』，所有動作copy得好快。」
海關動作太誇？
霆鋒做動作指導，對自己都冇特別錫身，好多動作都自己堅持做番。「的確係要說服導演，佢問一陣個炸彈喺身邊爆，都堅持做番？我話係！因為我同做爆破組合作廿年，第二個演員佢都唔敢炸，呢個就係默契。」
聽落凡事無懼，但其實霆鋒每拍一個動作場面都會有怯的時候，但這正正是他追求的感覺。「驚！我從來都會驚，但如果演員唔驚，觀眾係唔會睇得緊張。其實呢部電影已經收歛好多，因為始終係講海關，現在嘅動作場面已經誇咗少少，但電影就應該要誇少少，要咁寫實就不如去拍紀錄片，比起以前英雄式動作已經撳低好多。」
有呢份堅持，因為霆鋒一直相信香港動作電影是一份精髓。「咁多年可以威到去國際，好多外國演員因為睇咗香港動作電影，影響到自己想拍一部屬於自己國家嘅動作電影，例如Tony Jaa。我哋最出名嘅嘢都要放棄咩？我覺得好唔抵，如果我已經係最後個死剩種，連我都唔做嘅話，年輕一代就更加唔會做，好快就唔會知Hong Kong Action係咁威水。」
嘉欣跟學友苦戀第三次
林嘉欣今次與張學友，是繼《男人四十》及《暗色天堂》後，第三度演情侶，而在這亦劇透少少，二人最後都係冇好結果，難怪嘉欣都叫苦︰「十幾廿幾三幾都拍到對手戲，我都希望唔好再苦戀落去，我哋嘅愛情一直都冇結果，好慘。希望下一次可以有Happy Ending。」至於今次有幾慘，就要大家入場睇過先知。
不過今次在學友以外，嘉欣又搵到一位新對手，而且仲覺得同佢幾有火花，呢位就係吳鎮宇。「我同佢場面唔多，但每場都要同佢鬥，表現出自己好硬淨，主導個場面。我私下係個唔喜歡同人爭嘅人，但今次視為遊戲，你要決心贏佢就好好玩。而且鎮宇又唔會正常去做，衰衰格格咁搞到你團火就嚟。（點樣衰格法呢？）佢本身嘅氣場，同埋不耐煩嘅眼神，就令你好想鬥贏佢。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|