一首《戲劇人生》令葉振棠從夜總會band仔，變成當年樂壇炙手可熱的樂壇歌星，人生亦猶如歌名一樣，就此改變。棠哥接受《香港01》訪問時，透露去年經歷兩次大病後，頓時感覺人生變幻無常，希望趁體力還未衰退前，能夠在紅館唱歌給歌迷聽，但坦言壓力亦比過往大：「其實最大問題就係記歌詞，大家都知道我對眼視力好差，提詞器幫我唔到，所以全部我都要記晒入腦，唯有勤力啲囉，所以今次做紅館比起做文化中心、大會堂個勤力度要多10倍 。」
入行超過半世紀，原來棠哥當初根本沒想過做歌手，在澳門畢業後來港只為求一份穩定的寫字樓工，亦曾投考警察，可惜由於視力問題，一直都未能找到工作。一次街頭偶遇老朋友，為搵啖飯食而到夜場及夜總會擔任bass手，其後更簽約到百代唱片旗下，能夠踏入樂壇及創出高峰，棠哥認為運氣都好緊要：「覺得自己幾幸運，當時70年代所join嘅樂隊 碰到好多音樂造詣好高嘅人，好彩我個人好接受意見，邊度唔好就改。」
唱盡無數金曲，提到那些歌曲對自己別具意義，棠哥坦言必定是讓自己奪得人生首個歌曲獎的《戲劇人生》及《忘盡心中情》。棠哥指《戲劇人生》這首歌，確實有個小故事，更感謝已故黎小田先生選中自己唱《浮生六劫》的主題曲：「當年麗的電視興搵外面嘅歌手唱主題曲，而劇中的男女主角就會唱插曲，但係我唱咗主題曲唔係好耐之後，小田兄話『首插曲畀埋你唱』。插曲本來就係女主角（梁淑莊）唱，錄咗出嚟可能小田兄覺得效果未達到佢要求，好難怪，因為佢地（演員）做戲叻，未必唱歌係佢地強項，所以插曲畀我唱埋，就係呢首《戲劇人生》第一首能夠攞獎嘅廣東歌。」
至於談到唱到街知巷聞的《忘盡心中情》，棠歌透露當年大家都知道，如果可以在麗的電視亮相的話，即那位歌手的歌已經入屋，故唱片公司都會將歌手轉移去簽無綫電視，因為無綫出唱片的渠道比較多：「當年麗的冇乜綜藝節目，無綫就唔同，有《歡樂今宵》、《K-100》、《勁歌金曲》，如果出唱片會有好多節目同你宣傳，所以唱片公司就將我地掟咗過無綫。」亦速成了與顧嘉煇的合作：「我記得我第一首可以唱到煇哥作品就係嗰套《戲班小子》，後來1982年嗰年真係覺得自己行運，煇哥同我講同我度聲訂造一首歌，當年就錄咗周潤發同劉德華合演嗰套《蘇乞兒》主題曲《忘盡心中情》。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
