炎明熹（Gigi）今日（29日）出席MOSTown新港城中心活動，在台上獻她唱完歌《Little Magic》後，再唱首次現場演繹的新歌《還有一艘救生艙》前，她似有感而發：「依家開始要自強。」和「Gi炎粉」玩兩個遊戲時，其中一個遊戲道具是水泡，似乎相當應景，之後再玩揮旗仔遊戲，見她表情多多，心情不錯，台上活動約34分鐘就完畢，陪同她出席活動，除有經理人及唱片公司宣傳人員外，還有她的姑丈。
自4月演唱會後，首次出席公開活動的她，問到Gigi唱歌時聲沙，她說：「可能天氣熱問題，同埋女仔有啲嘢而導致有啲沙，（關唔關心情唔好事？）我心情還好，熱容易令人躁底，尤其是我，但我覺得呢度氣圍好好，心情都興奮嘅，都有一段時間冇同大家見面，見到大家咁熱情，（佢哋改口號嚟支持你？）我都驚訝咗，佢哋啲口號比以前長咗，第一次聽。」
問到傳因續約問題被無綫雪藏，她笑住謂：「我今日嚟到，算唔算雪？同大家見面都ok嘅，希望大家對我感覺冇變啦，因為唱到《還》時，有啲好感動感覺，上次演唱會喊到唱唔到成首歌，今日正式再唱時想喊，但係忍住囉，想喊嗰個點係因為估唔到佢哋唱晒出嚟，今日冇戴耳機就聽得更清楚，雖然我今天唔係唱得清楚，希望大家多多體諒啦。」
問到她可會和無綫續約，她說現時仍在傾洽中，工作由公司安排，望大家多多支持，她說：「合約嘅嘢又比較私人，順其自然，隨遇而安，一切都係最好嘅安排，（唔飲水思源嘅報道會唔會令你動搖？）其實做人係有原則嘅，但不忘初心同感恩係好重要嘅嘢，其實做好自己最重要，因為呢個世界太多人會講嘢同想做嘅嘢，所以做好自己最重要，每個人都有自己想做嘅嘢。（要傾幾耐？）我發現人大咗有啲嘢唔係咁簡單，亦有啲嘢唔係諗到咁複雜，要用自己思考去判斷所有嘢，我人大咗都有啲諗法如唱歌呀，想去嘗試，大家不妨期待一吓。」
她直言有和無綫反映想法亦獲得支持，亦想助她有更多發展同完成夢想，又指自己不忘本：「我畀大家認識都係公司，亦有自己粉絲，我唱歌有表演，我呢個都係幫咗我，（點解傾咁耐？）你又知耐？（成數有幾多？）我一直都想和和氣氣同好開心，我係好擔心錫我嘅人唔開心，好想大家正能量，我寧願自己唔開心多過大家唔開心。」
她又指沒接觸其他唱片公司，而親筆寫信是為免歌迷而作交代，不想錫她的人擔心。問她對續約有何要求？她說連自己也不知：「我又唔係傾好多嘢，接觸得好少，有時做音樂咁，問我想點，我都答唔到，我會問佢哋想要啲乜先，自己再配合，我經驗尚淺，都唔知自己要啲乜嘢。」有謂無綫沒派採訪隊到場，她就覺得可能檔期問題：「佢哋唔得閒。」
至於她未能出席港台頒獎禮，她解釋撞期所致：「有機會都想再上台，因為音樂係好神奇嘅事，（公司只安排商演，唔安排頒獎禮等活動），按公司安排工作係正常，可能最近比較多私人活動，大家唔會經常見到我。（滿意最近工作量？）每一段時間都有唔同工作量，我覺得還好，但都想多見粉絲，和愛錫我嘅人。」
講到After Class三缺一開演唱會，被飛起的她指其他成員早前忙考試，所以公司安排演唱會給她們和粉絲見面，問可會到場觀賞？她則大賣關子：「如果到時見到我就歡呼啦，講笑。」
被問到未來的工作安排，她回應：「希望大家見到我就多多支持我。」至於相隔一段時間沒有公開露面的原因，她坦言：「公司安排啲乜嘢就乜嘢，同經理人已經有一啲私人嘅活動可以同大家見。」再問到最近甄妮曾發文怒轟TVB疑為她出頭，她坦言有留意過這個消息，並表示：「我有睇過呢個post，但係我唔知道係咪講緊我，我都希望自己可以繼續加油，努力去裝備自己係一件好重要嘅事。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|