無綫《2024香港小姐競選》15位入圍佳麗今日（15日）首度見傳媒，當中包華姐鍾翠詩（Tracy）、「城大李嘉欣」倪樂琳（Ellyn）、「Hot版鍾麗淇」梁嘉莹（Emily）、莊曉婷（Kimmy）、謝淑怡（Zoie）、「艷麗版蔡潔」程姜月（Dolores）、楊梓瑤（Amina）、王汛文（Candice）、吳芷靖（Clary）、俞可程（Kanis）、秦冀雯、李曼思（Adria）、陳甜甜（Rose）、陳紫佟（Jessie）及盧凱怡，其中前14位之前已現身髮型屋變髮，唯獨盧凱怡當日沒有出現。
另外，今年港姐外景地點分五個地方，分別內蒙古、塞班、新加坡、菲律賓碧瑤及香港，會由不同女藝人帶領3位佳麗。另外，大會公布觀眾投票5名得票最高佳麗，分別是陳甜甜、梁嘉莹、李曼思、倪樂琳、吳芷靖。
Ellyn對此表示大感榮幸及開心：「有一班投我票網友，冇諗過大家咁支持我，收穫大家咁多嘅愛，我會打醒十二分精神，會嚴陣以待。」至於會否覺得「李嘉欣」的稱號為她帶來不少票數？她坦言：「多謝大家畀呢個稱號我，我自問冇佢咁靚，佢真係好靚，我唔敢當。呢個稱號有好有壞，好嘅係大家容易記得我，唔好嘅係好大壓力。（你係大熱，之前預咗成為5位票選最高佳麗？）我唔敢諗，因為唔知大家係咪真係會落手落腳投票畀我。我都有喺社交網呼籲大家投票畀我。」
另外，提到她曾與有「港版子瑜」之稱的藝人區明妙組本地女團Morii Girls，她澄清並沒有組女團，亦沒有出道：「只係同一班鍾意K-Pop嘅朋友一齊cover啲歌，唔算係出道或者係組女團，至於寫真係陽光積極嘅相，而唔係色情裸露嘅相，係一班女仔一齊去海灘影相打卡，唔係一啲唔好嘅嘢。（係咪依家唔再甫泳照？）唔會，我哋係好大方咁展示自己嘅身材，着泳衣大家都會喺決賽見到，唔係唔得體嘅嘢，後生女好多時都鍾意去沙灘打卡影相。」但她謂平時在社交網發文都會小心，因為是公開平台，希望給人正面形象。
而Emily對成為5位票選最高佳麗之一感開心：「多謝支持我嘅人，呢個成就唔止係屬於我自己，亦係屬於支持我嘅人，我會繼續努力。」她今日在台上不停轉換甫士，堪稱甫士王，她指自己上台前有對鏡練習一下，上台時對自己很有信心，故狂擺甫士，問她認為自己優勝之處？她說：「我上網睇到好多朋友都話俾我嘅自信同積極嘅生活態度感染，有個粉絲話因為我而鍾意咗健身同做運動。（入圍後喺社交網甫嘢會小心啲？）成為公眾人物後，無論甫任何嘢都會小心啲。」
至於李曼思多謝大家支持，問是否打下強心針？她稱對自己有信心，最自信是溜冰，之前在才藝表演中有示範溜冰。問到入圍後在社交網貼文會否更小心？她揚言不會：「做自己，欣賞你嘅人自然會欣賞，我冇因為參選而將社交平台大清洗，都係一切照舊。」
另外，部分佳麗的廣東話仍有待進步，當中「河北黃婉佩（Race@2R）」之稱的9號陳甜甜內地口音非常重，對於能成為觀眾投票最高頭5位，她表示感謝大家支持及喜歡，亦坦言有留意網民對她口音的批評，她指會聽取大家意見，亦希望大家給她一點時間學好廣東話，現時有跟老師學習，跟佳麗們亦盡量以廣東話溝通，更笑言不介走搞笑美女路線，最重要可帶給大家正能量。
而大熱之一的鍾翠詩為華姐亞軍，有選美經驗的她卻未能入選觀眾投票最高頭5位，她受訪時對此表示未有失望，覺得或因自己的口才未夠淡定而影響票數，又指入選5位佳麗都有自己優點，覺得可以互相學習，她又分享自己選美心得：「最緊要比賽當晚顯示到對自己嘅自信，保持笑容唔好驚，最緊要淡定，放開自己享受舞台。」提到她身高上較為輸蝕，她表示選美除了外表及身高外，內涵、口才及自信美也會影響評判的評分，直言對自己於舞台上的表現最有信心。
至於佳麗陳紫佟，是15位入圍佳麗中年紀最少，剛考完DSE的她即將迎來放榜，問到放榜跟選美哪樣比較緊張？她説：「都緊張！」又坦言自己人生經驗比其他佳麗少，會加倍努力做好自己：「説話技巧同儀態。（媽咪參選過？）係呀，不過佢因為要去留學所以退選咗。」她表示若DSE成績未如理想，會找其他途徑繼續學業，暫未打算出外升學，又指今次參選港姐獲媽咪支持，知道她成功入圍感到高興。
「艷麗版蔡潔」程姜月，在亮相環節時於台上撠到更險些跌落台，她受訪時解釋因台上地面不平坦，於綵排期間亦有其他佳麗被絆倒，到正式時就輪到自己「中招」，笑言當時有緊張了一下：「不過即刻調整返。（如果真係跌到點處理？）會即刻行番上去，因為唔想影響其他人。問到她未能入選觀眾投票最高頭5位，她表示未有失望：「15個女仔都優勢，無論邊個入都開心。」
提到她有教其他佳麗講廣東話，她表示有教9號佳麗陳甜甜：「平時有盡量同佢講廣東話，希望佢聽得好啲，其實語言唔係咁快學到，相信佢2個月後會更加進步，希望大家畀多啲時間佢。」
至於5號佳麗莊曉婷，穿起4吋高跟鞋亮相時，明顯步履不穩行得生硬，她表示平日很少穿高跟鞋：「會喺屋企練多啲。」她坦言首次面對大型比賽心情緊張，有很多地方需要改進。
無綫助理總經理（藝員管理及發展）樂易玲與製作部高級經理（非戲劇製作）何小慧也有現身，樂易玲稱入圍佳麗均是心水之選，提到有參賽者指合約太辣而引發退選潮，她說：「個合約咁多年都係一樣，係有啲嚴格，想選一個有心為香港出力嘅人，能夠做香港大使，我哋再三請律師研究過，最後都係決定保持不變。」
講到參賽者郭恩程本身有約在身，仍跟無綫簽約，她稱不會向對方追究：「可能佢當年都唔知自己簽咗啲乜，後來番去睇番先發現有約在身，我哋要求佢同對方解決，但佢過咗限期都解決唔到。（參賽者陳元元之前喺內地貼海報話投票送海鮮？）可能佢都唔知呢個行為有問題，而且佢本身都唔夠分數入圍，所以冇影響結果。」
提到退選的參賽者林瀾指獲樂易玲致電挽留？她坦承：「我覺得佢幾靚，但因為佢有工作，公司唔畀佢請假，我哋公司同事打畀佢，我同佢傾咗幾句，我叫佢考慮清楚，參賽與否將會係兩個唔同嘅人生，叫佢同家人商量再決定，我係有鼓勵佢。」對於今年有不少參賽者在社交網公開面試或合約內容，問之後會否就此作出限制？她坦言現時流行自媒體，難免有人以此增加流量，但認為無論佳麗或藝人，都希望他們能在社交網發放正能量。至於何小慧被問到稍後會否再淘汰佳麗，她稱要視乎她們在外景的集訓表現而定。
本文作轉載及備份之用 來源 source: http://hk.on.cc
|
鍾意就快D Share啦！
|
|
|