《公開試當真》是游學修、許賢、蘇致豪創立的試當真，於2023年DSE期間，拍攝許賢陪伴當屆DSE考生滕毅康考試的紀錄片，導演為梁奕豪（贊師父），電影亦特別找來張叔平擔任剪接，電影最終收$550萬票房。
蕭定一指自己向來「隱惡揚善」，「差嘅嘢我盡量都唔想講，最多唔講嘅啫。」但他覺得一定要鬧《公開試當真》，因為覺得這套電影「離晒譜」。他狠批這部紀錄片毫無誠意，要個「小朋友」（滕毅康）出鏡，但方法完全出誤，蕭定一指電影找來全港最強的補習老師林溢欣及其團隊，於四個月內力谷滕毅康，而許賢亦出於對母親的愧疚重考，他說：「再考許賢都冇考好到喎！根本成件事個用心就係諗住話，Hea讀啦大家，補習都冇用㗎喇，Hea讀四個月都唔會成績好咗，只係如果考試唔好，唔代表你人生都唔好，呢啲我當然完全認同……」
他續說，覺得整套電影最恐怖的，是作為一套紀錄片，其拍攝極度不認真，蕭定一再踩：「佢好似只係拍咗315個小時嘅footage，你講笑一部Proper啲嘅documentary，你睇吓真係好睇嘅《給十九歲的我》，拍咗七年，幾萬小時。」蕭定一認為團隊枉稱自己有誠意，並說：「我要插呢部戲，就係因為佢冇誠意，畀我感覺係一部呃觀眾錢嘅戲。好彩我冇入場咋，80幾蚊100蚊睇部咁嘅Documentary，真係我想𠝹櫈，我喺飛機度睇，嗰個半鐘頭我好似搭飛機去加拿大咁呀，好似搭咗12個鐘頭咁，嗰種冇娛樂性嘅程度，就係因為你唔夠footage囉，唔夠誠意囉！」
蕭定一認為電影只拍一個人去拍公開試，從而批判考試制度，卻沒有拍其他角度去平衡不同論點；而甚者是冇做品格審查，他講到男主角滕毅康早前再因盜竊被捕一事：「呢個人可以偷完嘢，幾個月之後再偷嘢，品德有冇問題呀？」蕭定一坦言，根本冇人會鍾意考試，但電影在批判考試的同事，卻沒提出比DSE更好的制度，他舉例：「有冇好嘅System去代替佢呀而家？有！你要講出譬如IB嘅System，咪好過佢囉，可以平時交功課計分，唔使一試定輸贏。有冇呢個Angle？冇，乜嘢都冇，冇娛樂性、冇footage、乜嘢都冇，Casting所有嘢都係問題！」
得知電影由張叔平剪接，蕭定一說他認為張叔平已經盡力「救」了這套戲，否則根本就只是一套爛片。他更直斥若「試當真」視這套電影為頻道的DSE考核的話，他會畀U。他說：「完全唔合格！冇誠意！唔係水平，垃圾！你哋返去檢討吓先啦，拍部咁嘅嘢出嚟，起碼最基本，你都要好似《給十九歲的我》拍五、六個學生啦，啱唔啱呀？平衡吓啲角度啦，啱唔啱呀？或者拍長啲時間啦，有啲考試好叻嘅人，結果都可以失敗，有啲考試唔叻嘅人，結果都好成功，拍乜春呀你哋？我對你哋好失望，作為新一代，如果你想做電影，唔X好做喇真係！冇誠意啊，真係張婉婷好過你太多喇！」影片在怒火中作結，網民皆留言表示好少見他這麼「勞氣」，短片末段發火亦甚有蕭若元影子。
其實蕭若元與「試當真」老闆游學修過往都曾因電影有「牙齒印」，未知今次蕭定一是否為父出氣。2021年2月，蕭若元於社交媒體Clubhouse內，就香港電影業未來與一眾年輕人激辯，當中包括游學修。雙方其後於各自的YouTube頻道隔空駁火，蕭若元批死香港電影業回復昔日輝煌「機會等於0」，更形容游學修所拍的YouTube片只是「煮飯仔」。
游學修則認為的確難以回到80至90年代輝煌的電影業，但也沒必要複製當時的成功，可以行一條新的道路，而「試當真」正是「要用舊嘅語言去做新嘅嘢。」他更有點怒氣說：「如果你同年輕人講機會等於零，你即係叫佢哋去死！」同年年尾，YouTube公布2021年度影片排行榜，頻道「試當真Trial & Error」成為年度熱門創作者榜首，游學修隨即於facebook上發文，點名身在台灣的蕭若元挑機說：「蕭若元，聽聞你上年拿了第 9位，有空回來香港交流交流！」
本文作轉載及備份之用 來源 source: http://www.hk01.com
|
鍾意就快D Share啦！
|
|
|