林景程給人的感覺斯文、謙虛、乖仔，講到是否從小到大都循規蹈矩，他直呼：「我好憎呢個性格呀！」小時候家人已訓練他，見到長輩一定要叫人，無論對方是否得閒，都一定要叫一句，而這竟然令他長大後見到長輩就很害怕，「就算去片場都係，我係好孤僻、好社恐咁樣，我見到人多我又驚，見到長輩我成個係定晒喺度，佢講咩我就話『係係，好好好，得得得，明白明白，可以可以』，嗰種嚟㗎。但係對我嚟講，咁樣好拘謹，我唔想自己咁。」他認為這個絕對是影響到演藝工作的缺點，非常吃虧，尤其是演員之間很講求溝通、默契，但他卻自言「我溝通唔到」，有時講完一兩句，已不知如何接下去，拍劇等埋位時索性躲在一旁，讓大家找不到他，「我唔識交際，我真係好差。」
嘗試戒內向主動開話題 氣氛反而更突兀
景程不是未試過改的，人人都說，見到監製要Social，他也試過主動上前搭話，但結果如何？他說：「好odd喎講完之後，仲odd過好似你就咁同佢講聲『早晨！午安』咁樣，嗰件事係搞唔掂。（係咪接唔到落去呀？）接唔到呀！接完落去之後，我就心諗『哎呀，死啦，dead air dead air，𨋢仲未到喎！我要講啲咩呢？真係唔知！跟住開門出去，『好拜拜！』」講完這句他再做出掩面動作，坦言：「真係搞唔掂。」實在十分搞笑。其實他也曾擔心被覺得不合群，所以其他人傾偈，他也試過站過去嘗試插嘴，卻總是找不到適合說話的時機，他更說：「我真係覺得自己做得好核突！大家傾偈我就企埋去，嘗試講，好似冇乜位插到入去喎，跟住我就全程變咗企咗喺度，跟住笑，熟我嘅人都知我係咁樣，佢哋又冇乜嘢，初初就可能覺得我好怪。」
性格拘謹怕長輩 鮑姐一個舉動超暖心
幸好景程在圈中遇到很多有愛的前輩、同事，例如在《下流上車族》演他母親的「鮑姐」鮑起靜，景程對她非常尊敬，有很多話想跟她說，卻不知從何入手，然而鮑姐也察覺到這一點，於是主動示好，「我記得有一次我化妝，化完之後佢從後攬住我，攬過嚟，佢同我講嘢，跟住嗰刻我覺得好溫暖！我知道佢係見到我好拘謹，而佢演我阿媽喎，佢想打破呢樣嘢，真係好好嘅前輩！我嗰刻同佢嘅戲，我係放鬆咗好多。」景程表示，自己在過往未必太多發揮機會時，所幸都有機會夥拍一些很好的演員，因此即使自己戲份不多，靠住觀察、請教等等，對提升演技都有很大得著，先是《踩過界II》的秦沛，再有令人覺得意想不到的視帝鄭嘉穎。
曾聽聞鄭嘉穎好惡 私下真面目令人意外
景程與嘉穎在《星空下的仁醫》合作，他曾聽聞嘉穎是個很惡的人，起初完全不敢跟對方攀談，「我以前唔認識嘉穎嗰陣時，好多人都話佢，『好惡㗎！唔好呀！唔好問啦，傻㗎咩？黐線！』但係我面對嘅佢又好Nice喎！」他指嘉穎教了他很多，當記者問到，既然外間說嘉穎這麼難相處，內向的景程怎麼會夠膽開口，但原來是嘉穎做主動的，其舉動更令景程受寵若驚呢！他說：「所以我話嘉穎其實係一個好好嘅人，因為嗰排電視播緊《殺手》，開緊工嘅時候，佢主動同我講話：『我有睇你《殺手》小秉，『做得好呀，有嘢㗎，做得好！』我話吓？鄭嘉穎同我講呢啲嘢？跟住我就『多謝多謝』，打蛇隨棍上，我就問佢究竟演戲應該點，因為佢打開咗個話題，令到我覺得呢個人係可以接觸，唔係我想像中嗰種恐懼，傳聞嚟嘅啫我覺得。」
鄭嘉穎不厭其煩教演戲 演路人甲成功開竅
景程說，自己當時戲份少，要準備的其實不多，於是在現場不斷捉住嘉穎問問問，「問到我自己都覺得煩！佢冇發過任何一個脾氣，佢真係全部慢慢同我講。」景程指自己做一整場戲反而還好，但以前常常都會做一些行行企企、無端端走入場景，講完一句對白就走的角色，他總是演得很不自然，而嘉穎一語中的直出問題是景程「唔入局」，他續說：「我嗰一句對白就講得好衰嘅真係，一句真係十隻字唔夠，但係真係㪐㪐㩿㩿或者窒。我記得我問過佢呢個點樣處理，因為我好困擾，對我哋成日都要做呢啲行行企企走入嚟講一句嘅，佢係會講返嗰個心態，即係你入到嚟之後，其實你就淨係諗住想講嗰一句對白，咁嗰一句對白就唔得囉，你係點解入嚟、你個角色係點樣、你出面做緊啲乜嘢先？你所有嘢有晒喺度，你咪等於一場戲囉！你成日都掛住入嚟，我淨係要講嗰一句對白，講完就走，所以唔會演到囉。」他聽完後茅塞頓開，之後演出也差很遠了。
與佘詩曼對戲 驚嘆神級演技原來已留力
景程在2023年的神劇《新聞女王》中，演出中槍昏迷十年再奇蹟甦醒的梁Sir，說句話都有困難，要逐個字吐出來，他演繹得非常好，其中一幕他要跟累他中槍的「Man姐」佘詩曼和解，問他有沒有從阿佘身上學到什麼，他說：「佢嗰種我係100%學唔到，因為佢係對我嚟講，我覺得唔係人嚟㗎，佢係神嚟㗎！佢嗰種運用眼淚嘅能力係，你唔會知道一個人係點樣可以調動到嗰個情感，而你望上去係咁隨意㗎。當然我明白佢係做咗好多好多好多好大量嘅功課先會有咁嘅嘢，但你要做到出嚟其實係好難。」
他指拍攝那一幕自己有很多對白要講，前半段鏡頭特寫再自己，但他講到中間見到阿佘已經快哭出來了，所有情緒都已準備就緒，當時他心想：「我仲有半頁紙未講喎。」而非常驚慌，然而最終其實是景程過慮了，他說：「做完我，再take佢嘅時候，嘩！原來佢係已經留咗力㗎喇，我望落去已經好靚，再Take佢嘅時候，嗰個先係最靚嘅佢，好難可以hold得到咁樣嘅嘢，但係佢做到，呢樣嘢我覺得就算佢話畀我聽點做，我諗我真係做唔到。」
.
本文作轉載及備份之用 來源 source: http://www.hk01.com
|
鍾意就快D Share啦！
|
|
|