

由陳山聰、阮浩棕以及「日本達人」陳方藤主持的《人生美食地圖 - 東京篇》昨晚(10日)在銅鑼灣宴請團隊食飯兼睇節目,陳山聰與陳方藤接受訪問時,表示今次平有平食、貴有貴食,但每晚早收工都會請工作人員食飯。「又唔會貼好多錢,而家yen抵咗,一定平過今晚呢餐。」問到節目中的餐廳名單是否已私藏多年,陳方藤表示當中有很多小店,平時甚少受訪。「大部分都拎晒出嚟,嫁女一樣,有集要開車4小時去靜岡食蟹,我係帶過屋企人同朋友去,應該唔會有遊客去。」

陳山聰表示一開始都有少少質疑,但用餐過後即大讚,途中更賺了富士山靚景。至於會否想「添食」,陳山聰表示在東京拍攝時,已想到有關西篇,並深信有吸引力法則。「因為Meter好熟關西,咁可以自駕遊,開到邊食到邊,曾志偉一點頭我哋就去。(越快越好?)又唔使,因為啱啱出街,同埋話7月先去,啲人成日話地震,所以冬天去最好。」

提到早前帶同仔仔Jaco撐林峯場,陳山聰表示完騷後,Jaco日日都《愛在記憶中找你》。「我頭先落機打畀佢都仲唱緊。(有無玩櫈?)相信佢好快玩,佢而家日日煩我,啱啱我喺美國登台都有唱《愛在記憶中找你》,有拍片畀佢睇,佢仲有《愛不疚》,相信我下個音樂會,佢會唱。(兩父子一齊玩櫈?)咁又唔得,無佢咁好腰力。」

另外,提到近日有連鎖食肆相繼結業,本身經營拉麵店的陳方藤表示已經無得可擔心。「唔好話北上啦,日本都係競爭對手,比較完個價錢,返嚟香港咪食少啲囉,所以都要諗計,香港人都靈活,一定有怪招可以搞到。(你有咩怪招?)諗到而家都講咗畀你聽。(算唔算捱緊?)捱,捱好多年,唔係呢刻,捱到內出血。」
本文作轉載及備份之用 來源 source: http://www.hk01.com
鍾意就快D Share啦!
|
|