法蘭克同熱刺簽約3年。
英超勁旅熱刺周五(13日)凌晨宣布，丹麥領隊法蘭克由賓福特過檔執教，雙方簽約至2028年。51歲嘅法蘭克上任後，立即要為上季排尾4嘅熱刺進行換血，收購目標包括賓福特愛將、盛傳正同曼聯斟介嘅麥比奧莫，同時意味南韓老將孫興民可能冇得留低，結束10年熱刺生涯。
熱刺雖然贏得歐霸盃冠軍，仍然決定將普斯迪高路炒魷，周五宣布法蘭克加盟簽約3年，據報佢哋會向賓福特支付1,000萬鎊轉會費。熱刺喺聲明中表示：「法蘭克有豐富英超經驗，佢將賓福特由英冠球隊打造成英超勁旅，長年都有超乎預期嘅成績，亦證明自己提拔球員同組軍嘅能力。」
法蘭克執教賓福特7年，成功栽培奧尼屈堅斯、艾雲東尼同麥比奧莫等球星。英國媒體報道，法蘭克計劃撬走兩名賓福特舊部，麥比奧莫同丹斯加特，其中麥比奧莫一直係曼聯獵物，但就6,000萬轉會費未達成共識；法蘭克已要求熱刺出手「截胡」，並用兩人共事6年嘅關係，希望遊說麥比奧莫「轉軚」，若計劃失敗就轉斟般尼茅夫嘅安東尼施美安。
法蘭克決意斥巨資收購翼鋒，令隊長孫興民離隊成數提升。熱刺跟隊記者Alasdair Gold爆料，孫興民等多位球員對普斯迪高路被炒感不滿，呢位南韓國腳亦唔抗拒轉會，尤其多間沙特豪門希望簽佢出任亞冠盃嘅「亞援」名額。報道指法蘭克將同孫興民會面決定去留，但主席利維就唔希望只剩1年約嘅孫興民免費轉會，即係如果「老孫」冇再簽新約，好可能今夏會被賣走。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
