麥比奧莫上季英超攻入20球。
曼聯周二(22日)展開美國之旅前，成功趕及簽入賓福特翼鋒麥比奧莫，呢位喀麥隆國腳轉會費總值7,100萬鎊，簽約後即隨隊赴美集訓。曼聯今夏轉會政策大反轉，專攻已經喺英超證明自己嘅球星，希望新兵可以「即食」交貨，據報夏天最後兩大收購目標，同樣係嚟自英超嘅球員。
曼聯同賓福特談判拉鋸多時，終於喺啟程去美國前傾掂，曼聯先支付6,500萬鎊，另有價值600萬鎊獎金條款，雙方簽署5+1年合約。將會着19號波衫嘅麥比奧莫表示：「由我知道有機會加盟曼聯，我就知要把握實現夢想嘅機會，我細細個就着曼聯波衫，我嘅宗旨係『比昨天變更好』，相信喺曼聯可以再闖新高。」
曼聯近年成績屢創新低，主因係長年買人「入錯貨」，技術總監韋確斯今夏將轉會政策大反轉，吸取以往喺海外高價收購海倫、奧拿拿、馬菲斯迪歷特、安東尼馬菲奧斯等失敗經歷，依家曼聯就專攻英超市場，上月已用6,250萬鎊收購狼隊嘅馬菲奧斯根夏，依家再買上季英超入20球嘅麥比奧莫，表現更有保證。
英國《太陽報》報道，曼聯奉行專攻「英超兵」策略，夏天最後兩個主要收購目標亦浮現，包括車路士前鋒尼高拉斯積遜，同埋阿士東維拉門將達米安馬天尼斯。《每日郵報》指曼聯有意用阿歷真度加拿祖作籌碼，對車路士交易積遜，同時有意以「先借後買」方式引入達米安馬天尼斯。
本文作轉載及備份之用 來源 source: http://hk.on.cc
|
鍾意就快D Share啦！
|
|
|